Situata e krijuar gjatë protestave në Shqipëri ka tërhequr vëmendjen edhe në Parlamentin Europian. Rihards Kols, anëtar i Komisionit për Punët e Jashtme (AFET), ka kritikuar ashpër qeverinë shqiptare për mënyrën se si po menaxhohen protestat, duke ngritur shqetësime për përdorimin e forcës ndaj të rinjve dhe trajtimin e gazetarëve në terren.
Në reagimin e tij, Kols vë në dukje kontrastin mes mesazheve që Shqipëria përcjell në institucionet europiane, ku paraqitet si aleate e besueshme e NATO-s dhe vend përparues në procesin e integrimit në BE, dhe pamjeve që vijnë nga protestat në vend.
“Shqipëria paraqitet në Bruksel si një aleate e besueshme e NATO-s dhe një nga vendet kryesuese në procesin e anëtarësimit në BE. Por në vendin e saj, policia përballet me studentët dhe të miturit duke përdorur plumba gome, gaz lotsjellës dhe granata zhurmuese. Gazetarët dhunohen teksa kryejnë detyrën e tyre”, shprehet eurodeputeti.
“Vlerat dëshmohen në vendin tënd”
Kols thekson se Bashkimi Europian dhe NATO mbështeten te parimet demokratike, shteti i së drejtës dhe respektimi i të drejtave të qytetarëve. Sipas tij, përdorimi i forcës ndaj studentëve dhe sulmet ndaj gazetarëve bien ndesh me këto parime.
Ai shkon më tej, duke e cilësuar situatën si një provë për standardet demokratike që duhet të respektojë Shqipëria në rrugën e saj drejt anëtarësimit në BE.
“Vlerat dëshmohen në vendin tënd. Qeveria e Shqipërisë po dështon aktualisht në këtë provë”, shkruan Kols në reagimin e tij.
Kritika për pretendimet mbi ndërhyrjen e huaj
Një tjetër pikë e reagimit lidhet me pretendimet për përfshirje të aktorëve të huaj në protestat që kanë përfshirë vendin. Eurodeputeti kundërshton idenë se zemërimi i të rinjve mund të shpjegohet duke ia atribuar atë ndikimit të jashtëm.
“T’ua atribuosh zemërimin e të rinjve shqiptarë ndaj korrupsionit dhe pandëshkueshmërisë ‘ndërhyrjes së huaj’ është një fyerje ndaj tyre”, deklaron ai.
Në përfundim, Kols kërkon që çdo rast i dhunës policore të hetohet, ndërsa thekson se qytetarët shqiptarë duhet të kenë mundësinë të shprehin vullnetin e tyre dhe të vendosin vetë për të ardhmen e vendit.
Deklarata
Shqipëria paraqitet në Bruksel si një aleate e besueshme e NATO-s dhe një nga vendet kryesuese në procesin e anëtarësimit në BE. Por në vendin e saj, policia përballet me studentët dhe të miturit duke përdorur plumba gome, gaz lotsjellës dhe granata zhurmuese. Gazetarët dhunohen teksa kryejnë detyrën e tyre.
NATO dhe BE-ja janë aleanca demokracish. Të dyja mbështeten te shteti i së drejtës dhe respektimi i qytetarëve. Përdorimi i gazit lotsjellës kundër studentëve dhe sulmet ndaj gazetarëve tregojnë të kundërtën. Vlerat dëshmohen në vendin tënd.
Qeveria e Shqipërisë po dështon aktualisht në këtë provë.
T’ua atribuosh zemërimin e të rinjve shqiptarë ndaj korrupsionit dhe pandëshkueshmërisë “ndërhyrjes së huaj” është një fyerje ndaj tyre. Çdo rast i dhunës policore duhet të hetohet. Shqiptarët duhet të kenë të drejtën të vendosin vetë për të ardhmen e tyre.
Albania presents itself in Brussels as a reliable NATO ally and an EU accession frontrunner. At home, the police meet students and minors with rubber bullets, tear gas and stun grenades. Journalists are beaten while doing their job.
NATO and the EU are alliances of democracies. Both are built on the rule of law and respect for citizens. Tear gas against students and assaults on journalists say otherwise. Values are proven at home. The government of Albania is currently failing that test.
Blaming “foreign interference” for young Albanians’ anger at corruption and impunity is an insult to them. Every case of police violence must be investigated. Albanians must get to decide their future.
— Rihards Kols (@RihardsKols) October 18, 2026
Discussion about this post