Përmbytje të mëdha kanë goditur ishujt turistikë të Indonezisë, Bali dhe Flores, duke shkaktuar të paktën 18 viktima dhe duke detyruar qindra banorë të braktisin banesat.
Reshjet e dendura të shiut, më të fortat në vite, përmbytën rrugë, nënkalime dhe shtëpi, ndërsa dhjetëra makina u morën nga rrjedha e ujit. Autoritetet thanë se gjashtë persona rezultojnë ende të zhdukur.
Në Bali, ku humbën jetën të paktën 14 vetë, situata është kritike në kryeqytetin Denpasar, ndërsa në zonat turistike si Canggu dhe Ubud rrugët janë shndërruar në lumenj.
Më shumë se 560 banorë u evakuuan dhe po strehohen në shkolla dhe qendra komunitare. Përmbytjet shkaktuan kaos edhe në qarkullimin drejt aeroportit ndërkombëtar I Gusti Ngurah Rai, ndërsa autoritetet i kanë paralajmëruar turistët të shmangin udhëtimet e panevojshme.
Në ishullin Flores, përmbytjet e rrëmbyeshme në distriktin Nagekeo morën jetën e katër personave, përfshirë një foshnje gjashtë muajshe. Katër të tjerë figurojnë ende të zhdukur.
Shërbimi Meteorologjik i Indonezisë (BMKG) bëri të ditur se reshjet ekstreme u shkaktuan nga valët Rossby ekuatoriale, të cilat nxisin formimin e reve të dendura dhe shira të pazakontë për këtë periudhë.
Indonezia përballet shpesh me përmbytje dhe rrëshqitje dheu gjatë sezonit të shirave, që kulmon nga nëntori deri në mars. Ekspertët paralajmërojnë se kanalizimet e amortizuara dhe urbanizimi i shpejtë, sidomos në Bali, po rrisin rreziqet kur reshjet e forta bien jashtë sezonit tipik të munsoneve.
Discussion about this post