Qeveria e Estonisë i ka kërkuar zyrtarisht NATO-s të aktivizojë Nenin 4 të Traktatit të Aleancës së Atlantikut të Veriut, pas shkeljes së hapësirës së saj ajrore nga tre avionë luftarakë rusë.
“Sot në mëngjes, tre avionë luftarakë rusë të tipit MiG-31 kanë shkelur hapësirën ajrore të Estonisë. Avionët e NATO-s reaguan menjëherë dhe detyruan avionët rusë të tërhiqen. Një shkelje e tillë është krejtësisht e papranueshme.
Për këtë arsye, qeveria e Estonisë ka vendosur të kërkojë konsultime në bazë të Nenit 4 të NATO-s”, tha në një deklaratë publike, Kryeministri i Estonisë, Krysten Michal.
Por çfarë është Neni 4 i NATO-s?
Neni 4 parashikon që shtetet anëtare të NATO-s mund të kërkojnë konsultime kur, sipas tyre, integriteti territorial, pavarësia politike ose siguria e ndonjë anëtari është e kërcënuar. Kjo është një masë para-krizës që synon koordinimin e qëndrimeve dhe marrjen e masave të përbashkëta për të shmangur përshkallëzimin.
Ministria e Jashtme konfirmoi se ka thirrur të ngarkuarin me punë të ambasadës ruse për t’i dorëzuar një notë proteste.
Ushtria ruse ende nuk ka dhënë një koment publik mbi ngjarjen, ndërsa në një deklaratë, ministri i Jashtëm i Estonisë, Markus Tsaka, tha se “Testimi gjithnjë e më i shpeshtë i kufijve nga Rusia dhe rritja e agresivitetit të saj duhet të përballen me një rritje të shpejtë të presionit politik dhe ekonomik”.
Sipas tij, gjatë vitit 2025 Rusia ka shkelur hapësirën ajrore të Estonisë gjithsej katër herë.
Lidhur me ngjarjen reagoi edhe Bashkimi Europian. Presidentja e Komisionit Europian, Ursula Von der Leyen, duke thënë se “Evropa qëndron në solidaritet me Estoninë përballë shkeljes së fundit të hapësirës sonë ajrore nga Rusia. Ne do t’i përgjigjemi me vendosmëri çdo provokimi”, shkroi ajo në platformën “X”.
Pak ditë më parë Rusia shkeli me dronë territorin polak dhe atë rumun, duke marrë për herë të parë përgjigje të armatosur nga NATO.
gijotina.com/
Discussion about this post