Ish-shefi i Komisariatit të Policisë në Kurbin, Dritan Metaj gjate deshmise se tij ne GJKKO, ka mohuar përfshirjen e tij në grupin kriminal të drejtuar nga i ashtuquajturi “baroni i drogës” Gëzim Çela.
“Akuzat e SPAK ndaj meje janë të padrejta dhe të pabaza. Transferimi im në Kurbin ishte i pa dëshiruar nga ana ime, por gjatë drejtimit tim nuk pati probleme të rendit dhe sigurisë. Madje janë asgjësuar qindra parcela me kanabis, jo vetëm me koordinata nga Guardia di Finanza, por edhe nga puna jonë në terren”, deklaroi Meta.
Ai tha se njohja me Gëzim Çelën vjen nga periudha kur ky i fundit ishte në polici dhe mohoi çdo lidhje me trafikun e drogës apo me pjesëtarë të tjerë të grupit.
Ndërkohë, avokati i tij Ardian Kalia kërkoi që akuza të rikualifikohet në shpërdorim detyre, pasi Metaj nuk kishte dijeni për një person në kërkim që nuk u arrestua.
SPAK ka kërkuar 168 vite burg në total për grupin kriminal të drejtuar nga Gëzim Çela, përfshirë dhe dy shtetas ukrainas të kapur pranë ujërave neutrale gjatë një tentative për shkëmbim droge me velierë.
Discussion about this post