Një ditë pas vendimit të Këshillit Bashkiak të Tiranës për shkarkimin e kryebashkiakut Erion Veliaj, propozimi zyrtar i është dërguar Këshillit të Ministrave për miratim. Kryeministri Edi Rama paralajmëron zgjedhje të parakohshme në kryeqytet, ndërsa Veliaj mund të ankimojë vendimin në Gjykatën Kushtetuese.
Procesi për shkarkimin e Erion Veliajt nga detyra e kryetarit të Bashkisë Tiranë po avancon me hapa të shpejtë. Pas votës së Këshillit Bashkiak një ditë më parë, ku 50 këshilltarë votuan pro largimit të tij nga posti, dokumentacioni është përcjellë tashmë në Këshillin e Ministrave për vendimin përfundimtar.
Shkarkimi vjen pas bashkimit të tre kërkesave të veçanta – nga Partia Socialiste, Partia Demokratike dhe këshilltari Endri Shabani – që u votuan si një propozim i unifikuar në seancën e djeshme të Këshillit Bashkiak.
Ndërkohë, me fokusin e zhvendosur tashmë tek zgjedhjet e parakohshme në kryeqytet, kryesocialisti Edi Rama zhvilloi sot një takim më shumë se dy orësh në Kryeministri me nënkryetarët e Bashkisë së Tiranës dhe me Ogerta Manastirliun, që pritet të jetë kandidatja e PS-së për Tiranën. Në takim mori pjesë edhe kryetarja e komanduar Anuela Ristani, e cila u largua një orë përpara përfundimit të mbledhjes.
Po sot, në orën 18:00, Rama pritet të mbledhë në një takim të veçantë ministrat dhe deputetët e qarkut Tiranë, takim që do të mbahet në parkun “Eden” pranë Kryeministrisë. Sipas burimeve, në fokus do të jenë organizimi dhe strategjia për zgjedhjet e ardhshme lokale në Bashkinë Tiranë.
Nga ana tjetër, Erion Veliaj ka lënë të kuptohet se e konsideron procesin të papajtueshëm me ligjin dhe Kushtetutën. Ai ka të drejtë që, brenda 15 ditësh, të ankimojë vendimin në Gjykatën Kushtetuese. Nëse ai zgjedh këtë rrugë, sipas nenit 115 të Kushtetutës, vendimi i Këshillit të Ministrave pezullohet automatikisht deri në vendimin përfundimtar të Gjykatës. Kjo do të bllokonte edhe mbajtjen e zgjedhjeve për pasuesin e tij.
Tashmë mbetet për t’u parë nëse Veliaj do të ndjekë rrugën ligjore për ta sfiduar vendimin apo do të pranojë largimin, duke i hapur rrugë procesit të zgjedhjeve të parakohshme në Tiranë.
Discussion about this post