Pas trazirave të fundit në kampin blu, Partia Demokratike do të mbledhë të shtunën Këshillin Kombëtar. Sekretari i Përgjithshëm i PD, Gazment Bardhi i është drejtuar me një mesazh demokratëve, duke zbuluar përmbajtjen që do të ketë rendi i ditës i kësaj mbledhjeje.
Sipas mesazhit, takimi do të fokusohet tek vendimet e Kryesisë së Partisë Demokratike si edhe tek aktet e dhunë së krijuar në datën 8 janar, kur u mbajt protesta e Berishës.
“Në vijim të datës së caktuar në mbledhjen paraardhëse, ju konfirmoj se mbledhja e Këshillit Kombëtar do të zhvillohet, ditën e shtunë, datë 15.01.2022, ora 16:30, në sallën e katit të II, selia qendrore e PD. Rendi i Ditës së mbledhjes është si më poshtë: Informim mbi vendimet e Kryesisë së Partisë Demokratike dhe diskutime mbi situatën e krijuar nga aktet e dhunës në datën 8 Janar. Shqyrtimi dhe miratimi i Rregullores së Brendshme të funksionimit të Këshillit Kombëtar, të përgatitur nga grupi i punës së ngritur me vendim të Këshillit Kombëtar nr. 172, datë 23.12.2021. Diskutim dhe informim për planin e organizimit të partisë dhe ndarja e detyrave për anëtarët e Këshillit Kombëtar”, shkruhet në mesazh.
Mbledhja e Këshillit Kombëtar vjen disa ditë pas vendimeve që u morën në mbledhjen e Kryesisë ku u vendos ndër të tjera, përjashtimi nga PD i 8 figurave të rëndësishme në historinë e kësaj partie, përfshirë ish-kryeministrin Sali Berisha.
Discussion about this post