Skandali mbulon skandalin me paratë e buxhetit të hedhura në Llogara. Ndërsa SPAK nuk ka mbyllur akoma dy dosjet, për tenderin e ndërtimin e tunelit dhe supevizionin e punimeve, del në dritë afera e re.
Rrok Gjoka, protagonist në tenderin ndërtimit të Tunelit të Llogarasë, meqenëse u përdor si maskë nga Belinda Balluku për vjedhjen e miliona eurove që po hetohen, u shpërblye më pas me tenderin e mirëmbajtjes së objektit. Fondi limit i tenderit ishte 311,040,000 lekë pa TVSH dhe iu dha kompanive “Gjoka Konstruksion” shpk & “4 A-M” shpk. Kjo e fundit me letra është në pronësi të Ardit Metaliajt, por pas saj fshihet oligarku tjetër Bashkim Ulaj. Kontrata u lidh me shpejtësi më 5 maj 2025, sepse duhej bërë gati trau për kalimin me pagesë në Tunelin Llogarasë. Megjithatë qeveria e shtyu hyrjen në fuqi për në shtator.
Një muaj më pas, më 5 qershor 2025, Gentian Gjyli ka shpallur fituesin e tenderit të mbikëqyrjes së kësaj kontrate.
Bëhet fjalë për prokurimin e Autoriteti Rrugor Shqiptar me objekt “Supervizion i Mirëmbajtjes së Tunelit të Llogarasë”. Fondi Limit për këtë punë është 11 602 008,00 lekë pa TVSH. Megjithatë, nisur nga shkalla e lartë të korrupsionit të konstatuar në raport me paratë e hedhura në Tunelin e Llogarasë, rëndësia nuk qëndron tek vlera monetare e këtij tenderi.
Kështu, megjithëse kanë marrë pjesë 5 studio në këtë procedurë prokurimi, fituesi ka qenë i paracaktuar, ndërsa procesi rezulton fiktiv.
Fituese kësaj kontrate katërvjeçare është kompania “A & E Engineering” SHPK e Entela Çanos. Dihet, që kjo është sipërmarrësja që mbyll letrat e tenderave që fitojnë oligarkët. Pra, pas firmës së Çanos për punimet e kryera dhe të pakryera, vijon derdhja e parave nga shteti për tenderat abuzivë. Por ky rast është flagrant!
Ju kujtohet koncesioni për ndërtimin e rrugës “Kashar-Pezë-Lekaj’? Në 13 shkurt 2023, fitues i këtij koncesioni u shpall kompania “AKPL” shpk. Sigurisht që ky bashkim gërmash ka prapa subjekte të tjera. Kompania fituese e koncesionit me afat 35 vjet me vlerë 474 869 965 Euro, është e përbërë nga 7 firma. Në krye prin “Gjoka Konstruksion” shpk, më pas vijojnë “Junik” sh.p.k.& “Cobial” sh.p.k. & “Pepa Group”sh.p.k & “UDHA” sh.p.k. &“Geoportal” sh.p.k. & “A&E Engineering” sh.p.k.
Pra, Rrok Gjoka dhe Entela Çano qenkan partnerë në këtë koncesion, që e ka miratuar Belinda Balluku.
Dhe dy vjet më pas, vartësi i Ballukut, Gentian Gjyli i jep Entela Çanos tenderin e supervizionit të mirëmbajtjes së tunelit të Llogarasë, që e ka fituar ortaku i saj Rrok Gjoka!
Hetimet e SPAK
Dy hetime janë hapur për tunelin e Llogarasë, projekt me të cilin dyshohet se janë përvetësuar 50 milionë euro. Prokurori i SPAK-ut Dritan Prençi po heton procedurën e kontraktimit të kompanive për mbikqyrjen e punimeve për tunelin e Llogarasë. Kompania Net Group, e ortakut të Berberit, Valter Begaj, në të cilën Berberi ka qenë ortak më parë, fitoi me një ofertë rreth 2 milionë euro garën për mbikëqyrjen, si bashkim operatorësh me kompaninë tjetër Hill International NV, me seli në adresën De Cuserstraat 91,108 CN, Amsterdam, Holandë.
Hetimi i dytë është hapur për tenderin e tunelit të Llogarasë, nën dyshimet për korrupsion, pastrim parash, manipulim të procedurave etj., pas një kallëzimi të Partisë Demokratike. Kallëzimi mori shkas nga një denoncim i ish-zëvendëskryeministrit Arben Ahmetaj, sipas të cilit tenderi për Rrok Gjokën u anulua pas takimeve në Ankara, duke ia dhënë një kompanie turke për 50 milionë euro më shumë. Kompania turke më pas kontraktoi kompaninë e Rrok Gjokës për të realizuar punime me vlerën që Gjoka kishte fituar tenderin fillimisht, pra 50 milionë euro më pak. Prokuror i dosjes së dytë është edhe kreu i SPAK-ut, Altin Dumani.
Të dy hetimet, përpos personave të mundshëm politikë, të çojnë tek një personazh kyç, i cili është oligarku Rrok Gjoka, përfituesi më i madh e parave publike pas Bashkim Ulajt. Rrok Gjoka është çelësi i zbërthimit të aferës së dyshuar. Rrok Gjoka ishte fituesi i tenderit, ku më pas pranoi anulimin e tenderit nga autoriteti kontraktor, për t’ia dhënë kompanisë turke me 50 milionë euro më shumë, e cila më pas kontraktoi sërish Gjokën për zbatimin e punimeve.
Ndërkaq, emri i Entela Çanos del në qendër të hetimeve të SPAK për aferat korruptive në Bashkinë e Kolonjës, ku përveç kryebashkiakut Erion Isai dhe disa zyrtarëve të tjerë, e pandehur është marrë edhe vetë Çano. Dosja e prokurorisë tregon se ajo kishte lidhje të ngushta me Isain, me të cilin komunikonte shpesh përmes ËhatsApp-it.
Ndërkaq, Drejtori i ARRSH, Gentian Gjyli, shkon thuajse çdo dy javë në SPAK. Më 13 maj 2025, Prokuroria e Posaçme vuri nën akuzë 25 persona, për abuzime me tenderët e rrugëve. I pandehur është kreu aktual i ARRSH, Gentian Gjyli, ndërsa ish-Drejtorit të ARRSH, Evis Berberi, i shtohen akuzat pas asaj për korrupsion dhe pastrim parash për të cilat ndodhet në burg.
‘U mora i pandehur’, tha Gjyli ndërsa dilte nga SPAK i nervozuar. Në këtë reagim duket se kreu aktual i Autoritetit Rrugor Shqiptar nuk e ka pritur mirë statusin e të pandehurit të drejtësisë për shpërdorim detyre dhe shkelje e barazisë në tendera. Janë mbi 10 praktika prokurimi të hetuara nga prokurori Dritan Prençi, i cili ka vënë nën hetim biznesmenë e zyrtarë publik, si edhe inxhinier të ARRSH. Ndaj tyre rëndojnë akuzat për shpërdorim detyre dhe shkelje e barazisë në tendera.
Gentian Gjyli u emërua drejtor i ARRSH më 28 mars 2024, një javë pas arrestimit nga SPAK të ish-drejtorit Evis Berberi, më 14 mars 2024. Kreu i ARRSH Gentian Gjyli, është thirrur edhe më herët në SPAK ku ka dëshmuar mbi procedurat e ndjekura në tenderët e rrugëve, gjatë kohës që ai ishte numri 2 i ARRSH-së dhe drejtor Evis Berberi, në hetim nga SPAK nën masën e sigurisë ‘arrest me burg’.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016
Discussion about this post