Kryedemokrati Sali Berisha ka reaguar ndaj kryeministrit Edi Rama, pas mbrojtjes që ky i fundit i bëri Ilir Rusmalit, këshilltarit të Presidenti Bajram Begaj për dekretin e zgjedhjeve të pjesshme në 6 bashkitë e vendit, përfshirë edhe Tiranën.
Përmes një postimi në rrjetet sociale, Berisha ka përgënjeshtruar Ramën, duke i kujtuar këtij të fundit shkarkimin e Rusmalit për korrupsion, asokohe në postin e Ministrit të Drejtësisë.
Sipas Berishës, Rusmalit iu komunikua largimi i menjëhershëm pasi tentoi të bënte pazare në Drejtorinë e Përgjithshme të Burgjeve për llogari të vëllait të tij.
“Mashtrim ordiner! E vërteta është: Ilir Rusmajli është ministri i shkarkuar pikërisht për korrupsion. Atij ju komunikua vendimi i prerë për largimi e tij nga detyra sepse shkarkoi jashtë kompetencës së tij ligjore drejtorin e përgjithshëm të burgjeve, i cili kishte refuzuar t’i japë tenderin vëllait të Ilirit dhe e kishte regjistruar kërcënimin që ai i kishte bërë në emër të vëllaiot ministër. Pasi ju komunikua shkarkimi ai u largua me dorëheqje. Kurse Drejtori i përgjithshëm i burgjeve qëndroi në detyrë dhe u falenderua për qëndrimin e tij antikorrupsion.”- shkruan Berisha krahas videos.
Discussion about this post