Dy punonjës sigurie në Portin e Durrësit kanë rënë në pranga pasi dyshohet se kanë vjedhur një motomjet të importuar nga Zvicra, me vlerë rreth 2500 euro.
Policia e Durrësit bëri të ditur se janë arrestuar shtetasit I. F., 45 vjeç, dhe G. D., 47 vjeç, të dy banues në Durrës, të cilët kishin detyrën për të ruajtur dhe siguruar objektin e portit. Pavarësisht funksionit të tyre, ata dyshohet se kanë bashkëpunuar për të vjedhur motomjetin që ndodhej në ambientet e portit dhe që ishte në pronësi të shtetasit K. K.
Falë veprimeve hetimore dhe informacioneve operative, policia arriti të lokalizojë dhe të arrestojë autorët e dyshuar, ndërsa motomjeti i vjedhur është sekuestruar si provë materiale.
Materialet i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Durrës, ndërsa ndaj të arrestuarve rëndon akuza për “Vjedhje e kryer në bashkëpunim, duke shpërdoruar detyrën.”
Discussion about this post