Foggia, Itali – Një nga bosët më të kërkuar të mafies italiane është arrestuar në orët e para të mëngjesit të së martës nga karabinierët italianë, duke i dhënë fund një arratie pesëvjeçare.
Leonardo Gesualdo, 39 vjeç, udhëheqës i organizatës famëkeqe mafioze Società Foggiana, u kap nga forcat speciale të Njësisë së Ndërhyrjes së Shpejtë (GIS) në një operacion të befasishëm në periferinë e qytetit Foggia, ndërsa ndodhej në gjumë.
Gesualdo ishte në kërkim që prej vitit 2020, kur arriti t’i shpëtonte një operacioni të gjerë policor që kishte në shënjestër struktura të rëndësishme të mafies në rajonin e Puglias. Ai ishte dënuar me 12 vjet burg dhe konsiderohej një nga të arratisurit më të rrezikshëm në listën e Ministrisë së Brendshme italiane.
Gjatë operacionit të zhvilluar pesë vite më parë, autoritetet kishin lëshuar 44 urdhra ndalimi, kryesisht për vepra penale që lidhen me zhvatjen dhe aktivitetet mafioze në zonën e Foggias.
Sipas mediave italiane, gjatë kontrollit në banesën ku fshihej, policia i gjeti një pistoletë të mbushur me gjashtë fishekë, çka e rëndon më tej pozitën e tij ligjore.
Società Foggiana, e njohur për brutalitetin dhe strukturën e ngjashme me Ndrangheta-n apo Cosa Nostra-n, është një nga organizatat më aktive kriminale në jug të Italisë, me ndikim të fortë në trafik droge, zhvatje dhe krime të dhunshme.
Arrestimi i Gesualdos cilësohet si një goditje e rëndësishme ndaj krimit të organizuar në rajon, ndërsa hetimet vijojnë për të identifikuar bashkëpunëtorët që e ndihmuan të fshihej për kaq kohë.
Discussion about this post