NATO nis stërvitjen bërthamore të hënën! Rutte: Do të mbrojmë aleatët tanë/ Putin: Kemi armë të reja atomike

Stërvitja vjetore e NATO-s për parandalimin e armëve bërthamore, do të organizohet nga Holanda dhe do të fillojë të hënën (13 tetor), me 71 avionë nga 14 vende që do të marrin pjesë.

“Stërvitja ‘Steadfast Noon’ i dërgon një sinjal të qartë çdo kundërshtari të mundshëm dhe ne do të mbrojmë të gjithë aleatët nga të gjitha kërcënimet”, tha Sekretari i Përgjithshëm i NATO-s, Mark Rutte.

Bazat në Kleine Brogel në Belgjikë, Lakenheath në Britani dhe Skrydstrup në Danimarkë do të jenë gjithashtu të përfshira, thuhet në faqen zyrtare të NATO-s.

“Ne duhet ta bëjmë këtë sepse na ndihmon të sigurohemi që parandaluesi ynë bërthamor të mbetet sa më i besueshëm, sa më i sigurt, sa më i mbrojtur dhe sa më efektiv të jetë e mundur”, tha Rutte.

Zyrtarët e NATO-s thanë se stërvitja nuk përdor armë bërthamore, por simulon skenarë në të cilët ato mund të përdoren.

Që nga pushtimi i Ukrainës nga Rusia në vitin 2022 , zyrtarët rusë kanë paralajmëruar herë pas here për rrezikun e konfrontimit bërthamor me NATO-n, e cila e ka dënuar një retorikë të tillë si të papërgjegjshme.

Megjithatë, në javët e fundit, tensionet bërthamore janë ftohur. Muajin e kaluar, Presidenti rus Vladimir Putin ofroi të ruante për një vit kufizimet mbi armët bërthamore strategjike të dislokuara të përcaktuara në Traktatin e NEW START, i cili skadon në shkurtin e ardhshëm.

Jim Stokes, drejtori i politikës bërthamore të NATO-s, u tha gazetarëve në selinë e aleancës në Bruksel se stërvitja Steadfast Noon ishte “rutinë” dhe “nuk ishte e drejtuar ndaj asnjë vendi”.

“Gjithashtu nuk është e lidhur me asnjë ngjarje të botës reale,” tha ai.

Ndëkohë Rusia mund të prezantojë së shpejti armë të reja, testimi i të cilave po vazhdon “me sukses”.

Kështu deklaroi Presidenti rus Vladimir Putin gjatë një konference për shtyp pas vizitës së tij në Taxhikistan.

“Ato po zhvillohen dhe testohen. Jemi duke përparuar. Aftësitë tona në parandalimin e sulmeve bërthamore janë më efikase se ato të çdo shteti tjetër të armatosur bërthamor dhe ne po i zhvillojmë kapacitetet tona mbrojtëse ne shpejtësi. Aftësia ushtarake në mbrojtje që kam thënë edhe në të kaluarën është ende në zhvillim e sipër dhe ne po e përsosim atë, theksoi presidenti rus.

gijotina.com/