Pas muajsh zhvendosjeje, mijëra palestinezë po kthehen në Qytetin e Gazës, vetëm për të gjetur rrënoja në vend të shtëpive, lagjeve dhe institucioneve që dikur u dhanë jetë komuniteteve të tyre.
Jawad Mahmoud Ajjour, 80 vjeç, tha për CNN se ka qenë dëshmitar i zhvendosjeve masive në luftërat e viteve 1956 dhe 1967, por asgjë nuk krahasohet me atë që sheh sot. “Nuk kam parë kurrë një shkatërrim të tillë,” tha ai.
Një tjetër banore, Um Abdullah, ndau një video të një çerdhe të shkatërruar që motra e saj kishte drejtuar për mbi 20 vite. “Ajo mësoi breza të tërë. Disa prej tyre u bënë gazetarë, mjekë… Ishte më shumë se një çerdhe, ishte një gur themeli për të ardhmen,” tha ajo.
Sipas Kombeve të Bashkuara, mbi 90% e shkollave në Gaza janë dëmtuar ose shkatërruar. Nga 564 ndërtesa shkollore, 518 kërkojnë rindërtim të plotë ose rehabilitim të thellë.
Banori i kampit Al-Shati, Younis Ahmed Mahmoud, përshkroi kthimin në shtëpi si një përvojë tronditëse: “U humba në rrugë… Mezi e gjeta shtëpinë. Dukej sikur tërmet kishte goditur zonën.”
Prej fillimit të ofensivës izraelite në gusht, qindra mijëra banorë janë larguar nga Qyteti i Gazës. Forcat izraelite (IDF) vlerësojnë se rreth 900,000 nga 1 milion banorët janë zhvendosur.
Sipas Zyrës së OKB-së për Koordinimin e Çështjeve Humanitare (OCHA), mbi 200,000 persona ndodhen ende në qytet, të rrethuar nga rrënoja dhe mungesa ekstreme e shërbimeve bazë.
Discussion about this post