Më pak se dy orë para nisjes zyrtare të protestës në mbështetje të Ushtrisë Çlirimtare të Kosovës (UÇK), sheshi “Skënderbej” në Tiranë ka nisur të mbushet me protestues nga trevat shqiptare.
Qytetarët, të pajisur me flamuj të UÇK-së dhe simbole kombëtare, janë mbledhur në qendër të kryeqytetit, ku nuk kanë munguar as fotografitë pranë monumentit të heroit kombëtar, Gjergj Kastrioti Skënderbeu.
Protesta pritet të fillojë rreth orës 17:00 dhe raportohet për një pjesëmarrje të konsiderueshme, e cila po rritet me kalimin e minutave.
Thirrjet e protestuesve janë të drejtuara kundër Gjykatës Speciale në Hagë, të cilën e konsiderojnë të njëanshme dhe të padrejtë ndaj ish-krerëve të UÇK-së.
“Thirrja jonë për Gjykatën Speciale është: t’i lirojnë bijtë e shqiptarësisë, përndryshe ne e llogarisim Evropën armik të shqiptarëve”, – deklaruan disa pjesëmarrës.
“Tani është e qartë se gjykata në Hagë është një gjykatë e krijuar për të dënuar UÇK-në. Dëshira jonë është të lirohen luftëtarët e lirisë: Hashim Thaçi, Kadri Veseli, Jakup Krasniqi”, – shtuan ata.
Organizatorët kanë bërë thirrje për një protestë paqësore dhe të dinjitetshme, ndërsa forcat e rendit janë të pranishme për të garantuar mbarëvajtjen e tubimit.
Discussion about this post