Plagosi me armë zjarri 24 vjeçarin në Bathore, arrestohet autori (Emrat)

Një konflikt mes dy të rinjve në Bathore ka përfunduar me plagosjen me armë zjarri të 24-vjeçarit Elvis Visha. Ngjarja ndodhi pasditen e së mërkurës, pasi mes të rinjve kishte pasur mosmarrëveshje lidhur me shitjen e një automjeti. I plagosuri ndodhet në spital jashtë rrezikut për jetën.

Sipas hetimeve paraprake, autori i dyshuar, Donaldo Bajrami, poashtu 24 vjeç, i kishte shitur makinën Vishës, por ky i fundit kishte shmangur kalimin e pronësisë në noter. Bajrami kishte këmbëngulur disa herë për ta formalizuar shitjen, ndërsa Visha, që sipas burimeve njihej si përdorues i lëndëve narkotike, dyshohet se e kishte refuzuar për shkak të frikës nga ndonjë incident rrugor që mund ta ekspozonte si pronar të mjetit.

Pas një debati mes tyre, situata ka degjeneruar në dhunë. Bajrami ka marrë në banesë një armë gjahu dhe ka qëlluar Vishën në krah. Pas ngjarjes, ai është arrestuar, ndërsa policia po vijon kërkimet për gjetjen e armës së përdorur.

Njoftimi i Policisë: 

Zbardhet dinamika e ngjarjes së ndodhur dje, në Bathore, ku mbeti i plagosur me armë zjarri një 24-vjeçar. Identifikohet, kapet dhe vihen në pranga autori i dyshuar i ngjarjes. Vijon puna për gjetjen e armës së zjarrit me të cilën u plagos 24-vjeçari, i cili është jashtë rrezikut për jetën.

Pasditen e djeshme, pas marrjes së njoftimit se në spital ishte paraqitur për të marrë mjekim, një shtetas që ishte plagosur me armë zjarri, specialistët e Sektorit për Krimet e Rënda të DVP Tiranë në bashkëpunim me Komisariatin e Policisë Nr. 5, organizuan menjëherë punën, me qëllim zbardhjen e rrethanave të rastit dhe identifikimin e autorit. Si rezultat i veprimeve profesionale, u identifikua, u kap dhe u vu në pranga autori i dyshuar, shtetasi:

D. B., 24 vjeç, për veprat penale “Vrasja me dashje”, mbetur në tentativë dhe “Mbajtja pa leje dhe prodhimi i armëve, armëve shpërthyese dhe municionit”.

Nga veprimet e para hetimore dyshohet se dje, në rrugën “Ali Këlçyra”, shtetasi D. B., gjatë një konflikti për motive të dobëta, me shtetasin E. V., 24 vjeç, e ka plagosur atë, në krah, me armë zjarri. Shtetasi E. V. ndodhet në spital, në kujdesin e mjekëve, jashtë rrezikut për jetën. Materialet procedurale iu referuan Prokurorisë së Tiranës, për veprime të mëtejshme.