Qeveria vendos afat 72 orë për raportimin e dyshimeve për pastrim parash

Këshilli i Ministrave ka miratuar një vendim të ri që detyron autoritetet licencuese dhe mbikëqyrëse të raportojnë menjëherë, brenda jo më shumë se 72 orësh nga momenti i konstatimit, çdo dyshim apo informacion që lidhet me pastrimin e parave, financimin e terrorizmit apo financimin e armëve të shkatërrimit në masë, pranë Agjencisë së Inteligjencës Financiare (AIF).

Vendimi, i propozuar nga Ministri i Financave, përcakton qartë edhe listën e autoriteteve mbikëqyrëse që kanë këtë detyrim ligjor. Në to përfshihen:

• Banka e Shqipërisë

• Autoriteti i Mbikëqyrjes Financiare

• Organet e qeverisjes qendrore

• Agjencia e Mbikëqyrjes së Lojërave të Fatit apo çdo autoritet tjetër që mbikëqyr kazinotë dhe hipodromet

• Ministria e Drejtësisë

• Dhoma Kombëtare e Avokatisë, për avokatët

Ky vendim synon të forcojë transparencën dhe bashkëpunimin institucional në kuadër të përpjekjeve kombëtare për parandalimin e pastrimit të parave dhe financimit të aktiviteteve të paligjshme.