Policia e Shtetit vijon të jetë në gatishmëri të përforcuar për shkak të situatës së krijuar nga moti i keq dhe reshjet intensive të ditëve të fundit. Strukturat vendore të Policisë, Patrullat e Përgjithshme, efektivët e Shqiponjave, si dhe Forcat Kombëtare të Sigurisë dhe Delta Forca, janë angazhuar në terren për t’u ardhur në ndihmë banorëve në zonat më të prekura.
Gjatë ditës së sotme, shërbimet e Komisariatit të Policisë Berat, në bashkëpunim me emergjencat civile të Bashkisë Dimal, ndërhynë menjëherë në fshatrat Çiflik dhe Arrëz, ku situata paraqitej e rënduar. Si rezultat i aksionit, u evakuuan 5 qytetarë, mes tyre edhe një e moshuar 100-vjeçare nga fshati Çiflik, e cila rrezikohej nga përmbytjet.
Në Devoll, shërbimet policore iu erdhën në ndihmë banorëve të fshatit Progër, ku reshjet e dendura kanë shkaktuar përmbytje dhe vështirësi në qarkullim. Prej orëve të mëngjesit, efektivët janë angazhuar në kërkim të një 75-vjeçareje me probleme të shëndetit mendor, e larguar nga banesa. Dyshohet se mund të jetë marrë nga rrjedha e ujit, dhe kërkimet po vazhdojnë pa ndërprerje.
Në të gjitha akset rrugore të vendit, Policia Rrugore ka rritur prezencën me qëllim parandalimin e aksidenteve dhe ofrimin e ndihmës për drejtuesit e mjeteve që mund të hasin vështirësi.
Ndërkohë, specialistët e Policisë në zonat rurale ndodhen në kontakt të vazhdueshëm me kryetarët e fshatrave dhe administratorët e njësive administrative, për të reaguar menjëherë në rast emergjencash.
Të gjitha sallat operative të Policisë janë përforcuar për të përballuar fluksin e telefonatave dhe për t’u përgjigjur në kohë reale çdo kërkese nga qytetarët.
Discussion about this post