Një operacion i zhvilluar nga Prokuroria e Posaçme Kundër Korrupsionit dhe Krimit të Organizuar (SPAK) ka çuar në zbardhjen e detajeve të grupit kriminal “Rraja”, pjesë e të cilit ishin edhe anëtarë të fisit Rraja, të përfshirë në trafik ndërkombëtar të drogës.
Sipas burimeve për mediat nga SPAK, grupi dyshohet se kishte trafikuar kokainë dhe marijuanë nga Mali i Zi, Turqia dhe destinacione të ndryshme në Bashkimin Evropian.
Hetimet, të kryera nga prokurori i posaçëm Adnan Xholi, u mbështetën në biseda të zbuluara në aplikacionin SkyECC, ku sipas SPAK u provuan disa episode të trafikut të drogës në kuadër të një grupi të strukturuar kriminal. Për këtë dosje, Gjykata e Posaçme, me kërkesë të SPAK, ka firmosur gjithsej 14 masa sigurie.
Nga hetimet rezulton se grupi ka kryer tre episode të mëdha trafiku ndërkombëtar me ngarkesa me kanabis në Mal të Zi: Një sasi prej rreth 1.8 tonë kanabis u bllokua në Mal të Zi dhe kishte destinacion Gjermaninë, ngarkesa me kokainë nga Amerika Latine: Mbi 400 kg kokainë u nis drejt Holandës, ngarkesa marijuanë drejt Turqisë: Një tjetër dërgesë lënde narkotike u transportua drejt Turqisë.
SPAK ka identifikuar pesë drejtues të grupit, të cilët dyshohet të jenë zbuluar përmes komunikimeve në SkyECC.
Gjatë këtij operacioni janë lëshuar 14 masa sigurie, nga të cilat 10 janë ekzekutuar, ndërsa tre prej të arrestuarve ndodhen aktualisht në burg, ku masa e arrestit iu është komunikuar brenda qelisë. Për katër të tjerët, operacioni vijon dhe ata janë shpallur në kërkim. Në pranga janë vënë Marvin Genci Bushati, Agim Nina (alias Lorenc Izet Selmani), Sokol Myslym Qaja, Gazmir Xhemali Rraja, Perparim Kadri Rraja dhe Rexhep Rraja dhe Zamir Aliaj.
Në burg ndodhen Islam Sefa, Algo Gjini dhe Jani Çavo, ku edhe iu është komunikuar masa tjetër e arrestit. Në kërkim janë Ervis Shuli, Bujar Sefa, Hajdar Sefa, Vildan Baroku. Ndër të arrestuarit është edhe Rexhep Rraja, djali i ish-deputetit të PS-së, Rrahman Rraja, i cili ka një histori të njohur për përfshirje në incidente të dhunshme dhe ngjarje kriminale të regjistruara më parë nga autoritetet.
Discussion about this post