Një grusht firmash po pastrojnë paratë e korrupsionit të zyretarëve dhe qarkullojnë paratë e buxhetit të shtetit përmes tenderave që zhvillon Dritan Agolli, drejtori i Fondit Shqiptar të Zhvilllimit (FSHZH). Në këtë seri tenderash të kushtueshëm hyn projekti më i fundit i firmosur nga Agolli për llogari të biznesmenëve ortakë me marrëveshje, Xhetan Ndregjoni dhe Renido Petritaj.
Për t’i hapur rrugë të sigurtë transaksionit me vlerë afro 6 miliardë lekë, drejtor Agolli ka zgjedhur t’i fshijë të gjithë konkurrentët. “Skualifikim i të gjithë operatorëve konkurrues përvec fituesit. Kusht: fituesi nuk është operatori me ofertën më të ulët”, kështu e ka klasifikuar Open Data Albania këtë tender. Për shkak të shkeljeve të hapura, procedura është shënuar me “Flamur të kuq”, që është sinjali i riskut të korrupsionit.
Më konkretisht, bëhet fjalë për tenderin me objekt “Përmirësimi i Infrastrukturës së Parkimit Faza II: Ndërtim i godinës së parkimit nëntokësor dhe godinës së shërbimeve administrative, Himarë” (Godina e Re)”.
Projekti ka fond limit 574,994,506 lekë pa TVSH dhe financohet nga buxhetit i shtetit për vitet 2025-2027.
Oferta fituse, 450 milionë lekë më e lartë se sa të tjerat
Në tenderin e mbajtur më 6 tetor 2025 kanë marrë pjesë 20 operatorë konkurues, por nuk ka pasur garë reale, pasi 13 kompani dhe bashkime firmash u skualifikuan menjëherë.
Kështu, më 11 nëntor 2025 është shpallur fituese oferta e bashkimit të operatorëve: “NDREGJONI” sh.p.k & “RAFIN COMPANY” sh.p.k me vlerë 418,352,516 lekë pa TVSH.
Por kjo u bë e mundur duke fshirë nga lista ofertat më të ulëta. Konkretisht operatori “GJIKURIA” sh.p.k ka propozuar ta bëjë këtë punë me 373,194,052.00 lekë pa tvsh. Oferta është skualifikuar si “anomalisht e ulët”, por komisoni nuk ka dëgjuar argumentet e kompanisë. Në të kundërt, sipas dokumenteve, oferta është skualifikuar menjëherë pa i kërkuar sqarim ofertuesit. Në fakt, sic e ka kostatuar shpesh KLSH për projektet e FSHZH, me shumë mundësi fondi limit është përcaktuar më i lartë pa marrë parasysh cmimet e tregut.
Edhe operatori “INERTI” sh.p.k, ka ofertë më ekonomike se sa jo fituese: 408,592,365.69 lekë pa tvsh. Komisioni e ka skualifikuar për mos plotësimin në formular të vlerës së një zëri, gabim i cili mund të korrigjohej brenda afatit, duke komunikuar me operatorin.
Kush është Xhetan Ndregjoni?
Pronari i “Ndregjoni” shpk, Xhetan Ndregjoni, njihet për tenderët e shumtë pa garë që fiton nga bashkitë në vend për çështje rindërtimesh apo rehabilitimesh. Ndregjoni u fut në listën e oligarkëve, kur mori statusin “Investitor strategjik” dhe “kontratë 1 euro” për pjesën e luanit nga koncesioni i Portit të Vlorës.
Më datë 13.10.2021, me anë të Vendimit të Këshillit të Ministrave Nr. 599, u miratua lidhja e kontratës së qirasë, me tarifën 1 euro/kontrata, ndërmjet Ministrisë së Financave dhe Ekonomisë dhe Bashkimit të Shoqërive “Marina di Valona” sh.p.k., “Brunes” sh.p.k., “Ndregjoni” sh.p.k. dhe “Marina Projects” LTD.
Kontrata 1 euro shërben për ndërtimin e hoteleve me vlerë 105 milionë Euro (pa TVSH). Kjo kontratë është e vlefshme për një periudhë 20 vjeçare. Nuk dihet se çfarë roli ka pasur Ndregjoni në këtë transaksion, por aktualisht koncesionin e ka marrë në dorë Geront Çela me dy kompani të vetat.
Duke qenë “investitor strategjik” i Belinda Ballukut dhe i kryeministrit Rama, Ndregjonit do t’i bëheshin në vazhdim favorizime nëpër tendera. Një prej tyre është tenderi me objekt “Rivitalizimi i parqeve natyrore nëpërmjet sigurimit të elementeve të mobilimit urban dhe shtimit të aktiviteteve të rekreacionit rajoni 2”, “Ndërtimi i amfiteatrit, fushave sportive, këndit të lojërave dhe shkallareve panoramike në liqenin e Paskuqanit”.
Konkretisht do të ndërtohen një kënd lojërash, dy fusha për aktivitetet sportive dhe disa shkallë në formë amfiteatri që do ta përdorë PS për fushatë. Kamza gjithë vitin nuk bën as dy tri shfaqje në Pallatin e Kulturës, tani i duhet edhe një amfiteatër në natyrë. Dhe për këto do të shpenzohen 2.3 milionë euro. Me sa duket qenka harruar fakti se kryebashkiaku Rakip Suli i hodhi aty 2.1 milionë euro për rehabilitimin e zonës rreth liqenit.
Më datë 27 qershor 2024, Ndregjoni u shpall fitues i kontratës, pasi Agolli u kishte vënë vizën 16 ofertave, ku kishte edhe më të ulëta se ajo e “investitorit strategjik”. Deri tani, nuk kemi parë as park as amfiteatër në Paskuqan, por radhën për t’u vjedhur e ka Himara.
Ndregjoni ka qenë bashkëpunëtor i afërt me drejtorët e Erion Veliajt që u arrestuan për korrupsionin me kompaninë 5D.
Tenderat e mëdhenj, 5D, edhe për shkak se nuk kishte kapacitete, i ka fituar në bashkëpunim me mbi 15 kompani të tjera ndërtimi, të cilat kanë marrë ‘pjesën e luanit’, edhe për shkak se kanë marrë përsipër të kryejnë pjesën më të madhe të punimeve si kompani të mëdha dhe të konsoliduara. Njëra prej tyre është “Ndregjoni” shpk.
Një bashkëpunim tjetër mes Renidos dhe Xhetanit është në tenderin e Bashkisë Tiranë me objekt: “Ndërhyrje rehabilituese në bllokun që kufizohet nga rrugët “Ibrahim Rrugova” – “Nikolla Tupe” – “Sami Frashëri” -“Brigada VIII” (në kuadër të ËALK 21). Fondi limit që i shkon në llogari kompanisë “Rafin Company” të Renido Petritajt dhe partnerit të tij “Ndergjoni” i Xhetan Ndregjonit është 246 602 671,00 lekë, pa llogaritur TVSH-në.
Tenderi u njoftua nga Anuela Ristani në Agjencinë e Prokurimit Publik më 2 qershor 2025, data e fundit për dorëzimin e dokumenteve ishte më 17 qershor 2025. Edhe ky tender u përfitur me “Flamur të kuq” nga favorizimi që u bëri kryetarja Anuela Ristani.
Djaloshi që po bën miliona euro, e nisi me biznesin me 100 lekë
Biznesmeni i ndërtimit Nefir Petritaj kontrollon 3 kompani bashkë me të birin Renido Petritajn dhe të bijën Fabiolën, përmes të cilave kanë marrë tendera me vlerë rreth 50 milionë euro.
Kompania kryesore është 2 F Construcion LTD, me emër të ndryshuar në Rafin Company, me pronar Renido Petritaj. Nga viti 2017 dhe deri më tani, Renido Petritaj ka arritur të fitojë rreth 70 tendera publikë, e vetme dhe në bashkëpunim. Një shifër e jashtëzakonshme për një kompani që e ka nisur nga zero në 2017, me kapital 100 lekë.
Gjysmën e vlerës së tenderave i ka marrë nga Bashkia e Tiranës, nën dyshime të forta të një lidhje klienteliste.
Duke shqyrtuar dokumentet dhe procedurat tenderuese, rezulton se Renido Petritaj, i cili shfaq luksin, makina të shtrenjta dhe bën kurbanë, ka fituar kontrata me “flamuj të kuq” korrupsioni në Bashkinë e Tiranës.
Në 31 janar 2022, Rafin Company mori tenderin me vlerë 5 milionë euro për ‘ndërtim pedonale, pistë vrapimi dhe korsi biçikletash në liqenin e Farkës’. Fituesi dyshohet se është paracaktuar pasi kompanitë e tjera pjesëmarrëse në garë si Varaku, Zdravo etj., nuk paraqitën dokumentet më elementare.
Në të njëjtën formë, pra me kompani që merrnin pjesë në procedura fiktivisht, Rafin Company mori edhe tenderin me vlerë 3 milionë euro për “Rindërtimin shkollës 9 vjeçare “Lidhja e Prizrenit”. Fasadën në këtë rast e kanë bërë kompanitë “Udha” dhe “Ulëza”, të lidhura me njëra-tjetrën dhe që kanë marrë tendera të tjerë nga e njëjta njësi vendore, Bashkia Kamëz, që i dha tenderin 3 milionë euro
Me kompaninë “Udha”, “Rafin Company” ka marrë një tender për rindërtimin me vlerë 4 milionë euro nga Fondi Shqiptar i Zhvillimit.
Renido Petritaj ka fituar edhe tenderat mirëmbajtje e rrjetit elektrik, hidraulik dhe dyer të brendshme në Konviktet e Shkollave të Mesme, Bashkia Tiranë, me vlerë 350 mijë euro, si dhe tenderin për mirëmbajtje e thellë në objekte publike, Bashkia Tiranë, me vlerë 300 mijë euro.
Më 13 mars 2025, një tjetër tender i dyshimtë ka përfunduar në duart e të njëjtëve emra që prej vitesh kontrollojnë fondet publike. Universiteti i Mjekësisë në Tiranë i drejtuar nga rektori Xheladin Draçini dhe administratori Arlind Broci, shpallën fituese kompaninë “RAFIN COMPANY” për rikonstruksionin e godinës së Fakultetit të Farmacisë dhe Shëndetit Publik.
Kontrata është lidhur për 209,735,061 lekë të reja pa TVSH (ose rreth 2.5 milionë euro me TVSH), ndërkohë që fondi limit ishte 221,176,615 lekë pa TVSH. Pra, vlera fituese përfaqëson 94.8% të fondit limit, një diferencë fare e vogël, e cila tregon mungesë konkurrence.
Në këtë tender kanë marrë pjesë pesë kompani. Dy prej tyre kanë ofruar çmime dukshëm më të ulëta, se ajo e “RAFIN COMPANY”, por për arsye të paqarta nuk janë marrë në konsideratë.
Ndërsa, para arrestimit, Erion Veliaj, më 24 janar 2025 i dha Renidos edhe një dorë tjetër lekësh të Bashkisë Tiranë. Më 30 maj 2018 përfundoi rikonstruksioni i plotë i Amfiteatrit, në dhjetor 2024 mësuam nga Erion Veliaj se u dashkan hedhur lekë të tjera, meqenëse paska hyrë “lagështira” nëpër dhoma! Në atë kohë amfiteatri u pajis edhe me skenën, podiumin, dhomat e zhveshjes së artistëve, gjithashtu edhe me sallën teknike nga ku projektohet në skenë. Erion Veliaj për të favorizuar Renido Petritajn fshin nga gara 3 kompani. Biznesmenit të ri nga Skrapari i ishin rezervuar 132 milionë lekë për bojatisjen e dy dhomave të Amfiteatrit tek Parku i Liqenit Artificial të Tiranës.
Porosia e Veliajt është çuar në vend nga Agjencia e Parqeve dhe Rekreacionit që është një nga ndërmarrjet e varësisë së Bashkisë Tiranë. Drejtoresha e agjencisë, Anisa Ruseti, të paktën sipas letrave, është marrë me organizimin e prokurimit, sidomos me justifikimin e fondit limit, preventivin, kalendarin e punimeve, për të nxjerrë këto para nga arka e bashkisë. Bëhet fjalë për tenderin “Rikonstruksion i ambienteve të shërbimit në funksion të amfiteatrit” me fondin limit 13 257 948,00 lekë pa llogaritur TVSH.
Të rinjtë e thjeshtë deri në 23 vjeç nuk arrijnë as të mbyllin studimet e larta, ndërsa Renido në këtë moshë krijoi kompaninë “2F CONSTRUCTION LTD” sot RAFIN COMPANY SHPK. E nis me investimin 100 lekë dhe sot luan me miliona euro që i përfiton nga tenderat e Lali Erit dhe zyrtarët e tjerë.
Edhe pse pa eksperiencë dhe pa kapital, në vitin 2017 xhiroja vjetore shkon 1 milionë USD, ndërsa në vitin 2019 dyfishon xhiron vjetore, duke shënuar kulmin në 2020, ku ka marrë miliona euro tenderë, me procedura të dyshimta dhe klienteliste, dukshëm korruptive. Tenderët e dyshimtë reflektohen edhe në rritjen e kapitalit themeltar të kompanisë nga 100 lekë që ishte në mbi 200 mijë USD në vitin 2020.
Vitin e kaluar, Erion Veliaj e ka furnizuar Petritajn me fonde duke e favorizuar hapur. Nje tender me “Flamur të kuq”, me vlerë 624 milionë lekë, i është dhënë kompanisë RAFIN COMPANY në qershor 2024, nga Bashkia Tiranë. Tenderi ka për objekt: “Shërbime për mirëmbajtje të objekteve specifike”.
Ndërsa ish-ministri i Mbrojtjes, Niko Peleshi, më 15 nëntor 2023, i dha Renidos tenderin me objekt “Përmirësimi i infrastrukturës në garnizonin Skënderbej” me numër reference REF-85600-10-27-2023 dhe me fond limit në vlerën 216,937,400 lekë të reja pa TVSH ose gati 2.6 miliardë lekë të vjetra me TVSH.
Vihet re se, ndonëse fituese është shpallur kompania e Renido Petritaj, 6 kompani të tjera kanë ofruar shifra më të vogla dhe nuk janë marrë në konsideratë. RAFIN COMPANY e Petritajt u shpall fituese për vlerën 170,619,035 lekë të reja pa TVSH ose rreth 2 miliardë lekë të vjetra me TVSH. Ajo garoi si bashkim operatorësh me kompaninë tjetër NDREGJONI në pronësi të Xhetan Ndregjonit.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post