Dritan Agolli i ndan paratë e Fondit Shqiptar të Zhvillimit në një dore të vogël biznesmenësh që i favorizon në procedurat e prokurimit. Dy prej tyre të vecuar së fundmi, janë Refit Hyseni dhe Erjon Kërri. Herë është njëri përfaqësues i këtij partneriteti, herë tjetri. Së fundmi, para Kishtlindjes, Dritan Agolli u ka dhënë projektin për rikosntruksionin e tregut të qytetit të Vlorës.
Prokurimi ka si objekt “Investime për infrastrukturën e tregtare në zona model zhvillimi, etj. Faza III Rajonet 3&4: Rikualifikimi urban në zonën e tregut të hapur të qytetit të Vlorës – Faza 1”. Fondi limit i përcaktuar për projektin është 150,788,542 lekë pa TVSH, që paguhen nga buxheti i shtetit.
Tenderi me “Flamur të kuq” korrupsioni
Në tenderin e mbajtur më 26 nëntor 2025 kanë marrë pjesë 10 operatorë konkurues. Megjithatë komisoni i Agollit e ka kthyer tenderin në farsë duke eliminuar konkurrencën.
“Skualifikim i të gjithë operatoreve konkurrues përveç fituesit. Kusht: fituesi nuk është operatori me ofertën më të ulët”, kështu e klasifikon Open Data Albania tenderin e Agollit për fasadën e tregut të Vlorës.
Tenderi është shënuar me “Flamur të kuq” që sinjalizon riskun e korrupsionit. Konkretisht, më 16 dhjetor 2025, kompania “MODESTE” shpk me pronar Refit Hysenin me mbështetjen e “ARKON-STUDIO” shpk me pronar Erjon Kërrin janë shpallur fitues me ofertën 115,228,738 lekë pa TVSH.
Komisioni i Agollit nuk i ka marrë në konsideratë ofertat më të ulëta dhe më ekonomike, duke i skualifikuar qysh në fillim.
Sipas dokumenteve të paraqitura në Agjencinë e Prokurimit Publik, bashkimi i operatorëve “BEAN” shpk dhe “J O G I” shpk kanë bërë ofertën më të ulët, me vlerën 108,045,232 lekë pa TVSH.
Po ashtu, koalicioni “C O L O M B O” shpk & “BRITANIA” shpk & “BAJRAMI N” shpk propozonte ta kryente këtë punë me 110,415,189 lekë pa tvsh.
Ndërsa BOE “MF INVEST GROUP” shpk & “MANE/S” shpk kishte ofertën me vlerë 104,856,012.70 lekë pa tvsh.
Edhe operatori ekonomik “AGI KONS” shpk ka ofertë më të ulët: 113,551,603.02 lekë pa tvsh.
Vazhdimësia e korrupsionit: Pa mbaruar një kontratë, gati tjetra
Më 11 nëntor 2024, Refit Hyseni dhe Erjon Kërri morën nga Dritan Agollin tenderin 7 miliardë lekë me objekt “Transformimi i infrastrukturës akomoduese në kampuset rajonale të arsimit profesional, në bashkinë Elbasan, Lushnje, Vlorë, Dibër, Shkodër, Kukës”.
Kontrata akoma nuk ka përfunduar pasi kohëzgjatja e këtij projekti është 14 muaj. Nëse komisioni do të zbatonte ligjin, duhet ta skualifikonte këtë bashkim operatorësh në tenderin e sapofituar, sepse kapacitetet e tyre janë të shpërndara në kantieret e një kontrate tjetër publike. Por fuqia e korrupsionit është më e fortë se sa ligji për prokurimet.
Drejtori i FSHZh, Dritan Agolli, është nën hetim nga SPAK, ndër të të tjera edhe për tenderat e projektit “100 fshatrat”. Dritan Agolli është paraqitur në SPAK në nëntor 2024. Ai është pyetur për një tender me vlerë 500 mijë dollarë të FSHZH-s për një menu të projektit “100 fshatrat”.
Tenderi u fitua nga dy shefa kuzhine, një nga të cilët ishte i punësuar në një restorant në pronësi të djalit të Agollit.
Po ashtu, Dritan Agolli është pronar i një kompanie e quajtur ‘Magnum Opus’ group me objekt studime në nivel strategjik, menaxherial, operacional, analiza, vrojtime, sondazhe, konsulencë, shërbime administrative etj.
Kompania rezulton që ka marrë para publike. Agolli ka siguruar para publike përmes nënkontraktimeve dhe kompaninë që u ka dhënë tendera publik.
Ka një marrëdhënie që kreu i FSHZH ka kryer me kompani private, me të cilët i ka lidhur interesi.
Një vit pasi Agolli është emëruar në krye të FSHZH, i biri i tij deklaron se gjyshi i ka dhuruar një shtëpi me sipërfaqe gati 1550 metra/katror, ndërsa Agolli ka deklaruar në institucionin kundër pastrimit të parave se ka shitur një apartament 360 mijë euro, ndërkohë që vlera e tij ka qenë gjysmë për gjysmë në kohën e blerjes.
Me këtë lëvizje ka justifikuar blerjet e apartamenteve dhe garazheve ku ai jeton dhe i ka pronë të tij. Bëhet fjalë edhe për një shumë që do t’ia kalonte biznesit të djalit të tij, 400 mijë euro.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post