Deputeti i Partisë Demokratike, Gjin Gjoni, e ka cilësuar qeverinë si të papërgjegjshme, lidhur me përmbytjet që përfshinë të gjithë vendin, si dhe ka akuzuar kryeministrin Rama se po tenton t’i shpëtojë drejtësisë.
Gjoni deklaroi se dëmet e shkaktuara në pasurinë e qytetarëve, në blegtori dhe në tokat bujqësore janë të jashtëzakonshme.
Sipas tij, ndërsa reshjet janë një fenomen natyror, zgjatja e përmbytjeve për javë të tëra është pasojë e drejtpërdrejtë e mungesës së ndërhyrjes nga shteti dhe emergjencat civile. Ai theksoi se kjo situatë “po nxjerr në sipërfaqe të gjithë llumin e korrupsionit të kësaj qeverie”.
Duke u ndalur konkretisht te situata në Durrës, Gjoni u shpreh se ajo që ka ndodhur në këtë qark ka zbuluar “abuzimin shtetëror”. Ai kritikoi ashpër kryeministrin për fajësimin e qytetarëve, duke i quajtur “zhulsa”, si shkaktarë të përmbytjeve. Deputeti përmendi se vetëm një investim në Durrës për kanalet e ujërave të larta dhe hidrovorët kap vlerën e rreth 20 milionë eurove, duke lënë të kuptohet se fondet nuk kanë shkuar aty ku duhet.
Ai shtoi se kreu i qeverisë nuk mban asnjë përgjegjësi dhe është i fokusuar vetëm në një qëllim: t’i shpëtojë ndëshkimit nga drejtësia.
“Po shkaktohen dëme të jashtëzakonshme në pasurinë e qytetarëve. Përveç taksave të cilët vilen, njëkohësisht rezulton që ka dëmtime në gja të gjallë, në ushqimin e gjesë së gjallë, në tokat bujqësore dhe prodhimet e tokave bujqësore, dhe unë e kuptoj që rreshjet ndodhin në çdo vend të botës dhe përmbytjet ka në çdo vend të botës.
Por përmbytje që të zgjasin me javë të tëra për shkak të mungesës së ndërhyrjes së shtetit dhe emergjencave civile, por njëkohësisht edhe mungesës së investimeve të cilët, tanimë po e nxjerrin në sipërfaqe të gjithë llumin e korrupsionit të kësaj qeverie, tregon që kjo qeveri është e papërgjegjshme ndaj ndjeshmërisë qytetare.
Situata e Durrësit është një situatë e cila duhet të ndalemi në mënyrë të detajuar për shkak se situata e Durrësit ka nxjerrë në sipërfaqe të gjithë abuzimin shtetëror në lidhje me këtë qark dhe me këtë zonë. Padyshim, siç e përmendët edhe juve në insertin e paraqitur pak më parë, investimi në Durrës, vetëm një investim, është rreth 20 milionë euro, që ka të bëjë në lidhje me kanalet e ujërave të larta dhe njëkohësisht edhe me hidravorët.
Rezulton që kryeministri i Shqipërisë nuk mban as edhe një lloj përgjegjësie në lidhje me të gjithë abuzimet, sepse tani më, ai nuk merr përsipër në mënyrë më absolute që t’i përgjigjet kërkesave të qytetarëve. Ai po mendon vetëm e vetëm se si të shtyjë dhe t’i shpëtojë ndëshkimit nga drejtësia, që sipas informacioneve të kohëve të fundit, unë besoj dhe jam i mendimit që është më afër se kurrë që të thirret nga institucionet ligjzbatuese, jo vetëm në Shqipëri, por edhe në Shtetet e Bashkuara të Amerikës”, u shpreh Gjoni.
Discussion about this post