Është arrestuar në Arezzo autori i dyshuar për vrasjen e 25-vjeçarit shqiptar Kevin Muharremi, i cili u ekzekutua me armë zjarri në orët e para të mëngjesit në Montecalvoli, në provincën e Pizës.
Sipas mediave italiane, i ndaluari është një bashkëkombës i viktimës. Ai u bllokua nga forcat e rendit në segmentin e autostradës A1 që kalon në zonën e Arezzos, ndërsa për ngjarjen po hetojnë karabinierët e komandës provinciale të Pizës.
Sipas të dhënave paraprake, Kevin Muharremi u qëllua me një ose më shumë plumba teksa ndodhej në automjet me dy miq të tij. Ai ishte ulur në sediljen e përparme, në anën e pasagjerit, kur një automjet tjetër iu afrua dhe nga aty u qëllua me armë zjarri. Një prej plumbave e ka goditur në qafë, duke i shkaktuar vdekjen.
Hetuesit po punojnë për të rindërtuar motivin e krimit. Nga informacionet e para dyshohet se vrasja mund të ketë ndodhur në kulmin e një sherri, që mendohet të ketë nisur më herët në një bar në zonën Capanne.
Pista kryesore mbetet ajo e një konflikti të përshkallëzuar, ndërsa nuk përjashtohet edhe mundësia e një atentati të paramenduar.
Para arrestimit, karabinierët e njësisë hetimore të Pizës mblodhën dëshmi në vendngjarje dhe analizuan pamjet e kamerave të sigurisë në zonë. Më pas u shpërnda një njoftim kërkimi për personin e dyshuar si autor i të shtënave, i cili ishte larguar menjëherë pas krimit.
Mediat italiane kanë publikuar edhe foton e të riut shqiptar, i cili përshkruhet nga të njohurit si një djalë punëtor dhe pa precedentë penalë. Ai punonte në një lavazh makinash, punë me të cilën siguronte jetesën e tij.
Miq dhe familjarë kanë zgjedhur të mos prononcohen publikisht për ngjarjen e rëndë.
Krimi ka tronditur komunitetin në Santa Maria a Monte dhe Fuceçhio, zona të konsideruara përgjithësisht të qeta. Autoriteti Gjyqësor vijon hetimet për të hedhur dritë të plotë mbi rrethanat, motivin dhe përgjegjësitë penale në këtë ngjarje të rëndë.
Discussion about this post