Ministrja e Shëndetësisë, Evis Sala së bashku me drejtoreshën e Qendrës Spitalore Universitare Nënë Tereza, Anxhela Paparizo, zhvilluan këtë të enjte një konferencë për shtyp për të diskutuar lidhur me gjendjen aktuale të sistemit shëndetësor në vend.
Një nga temat kryesore ishte mungesa e barnave dhe e terapive për pacientët me sëmundje të rënda.
Drejtoresha e QSUT-së, Anxhela Paparizo, u pyet mbi çështjen e korrupsionit brenda spitaleve, ku pacientët ndonjëherë detyrohen të paguajnë për shërbime që duhet të jenë falas.
Paparizo tha se nuk është në dijeni për raste të tilla dhe se deri më tani nuk ka pasur asnjë denoncim zyrtar pranë strukturave përkatëse për marrje parash nga ana e mjekëve.
“Në dijeninë time nuk kam njohur për marrje lekësh, nuk kemi asnjë denoncim në strukturat përkatëse për marrje lekësh nga mjekët”, tha ajo.
Ndërsa drejtoresha po përpiqej t’i përgjigjej pyetjes, në krah të saj u dëgjua edhe ndërhyrja e këshilltares së ministrisë, Albana Qehajaj, e cila i sugjeroi: “Vazhdo për kardiologjinë, mos iu përgjigj.”
Moment që nuk i shpëtoi vëmendjes, duke krijuar një situatë ironike në një konferencë ku pritej më shumë transparencë për shqetësimet e pacientëve.
Deklarata për “mosdijeninë” mbi fenomenin e pagesave nën dorë, një problem i përfolur prej vitesh në sistemin shëndetësor, u shoqërua kështu edhe me një kujtesë nga krahu i djathtë për të qëndruar tek tema e kardiologjisë. Mes premtimeve për godinën e re dhe mungesës së denoncimeve zyrtare, duket se diskutimi për paratë e pacientëve mbeti sërish jashtë “diagnostikimit” publik.
Discussion about this post