Edi Rama duket se ka zbuluar një “strategji” të re për të përmirësuar imazhin e Shqipërisë në sytë e investitorëve të huaj: jo reforma, jo luftë reale kundër korrupsionit, por… një gotë raki.
Duke folur në edicionin e dytë të MatchMaker Albania, Rama zgjodhi të bëjë humor me një nga plagët më serioze të vendit, duke sugjeruar se efekti i rakisë mund të jetë më i fuqishëm sesa çdo politikë publike për të “zbutur” shqetësimet mbi korrupsionin dhe krimin e organizuar.
“Sot në stendën ‘takohu me qeverinë’ nuk do të gjeni vetëm raki, por do të gjeni pak raki, edhe pse nuk është më e nevojshme për t’ju dhënë entuziazëm kur vini në Shqipëri, provojeni, do t’ju bëjë që Shqipëria t’ju duket edhe më e mirë, por efekti më i madh apo më i shkëlqyer i saj është që do t’i sjellë të gjithë në qejf e të mos vuajnë artificialisht për këtë problemin tonë, korrupsionin dhe krimin e organizuar”, tha Rama.
Rama gjithashtu falënderoi edhe investitorët gjermanë duke dhënë edhe lajmin se shumë shpejt do të vijë në Shqipëri, rrjeti gjerman i supermarketeve LIDL.
“Njerëzit e LIDL që janë këtu, po punojnë me ne dhe shpejt do të çelin mjedisin e tyre të parë, objektin e tyre të parë dhe ashtu siç më thotë dikush, kur vijnë gjermanët, vërtet je në një nivel tjetër”, u shpreh ai.
Discussion about this post