Zyrtarisht, detyra e Presidentit të Kosovës i ka kaluar kryeparlamentares Albulena Haxhiu, pasi Vjosa Osmanit i përfundoi sot mandati.
Akti ceremonial i dorëzim-pranimit të detyrës u mbajt në Kabinetin e Presidentes sot në orën 16:00. Gjatë ceremonisë, Haxhiu i dhuroi lule Osmanit.
“Ju dëshiroj mirëseardhje zonja kryetare e Kuvendit dhe nga sonte në mesnatë edhe ushtruese e detyrës së presidentes së Republikës. Gjithnjë ka qenë një nga dëshirat e mia të mëdha që kurdo që dal nga kjo zyrë ta lë një grua mbrapa. Kjo dëshirë sot po më plotësohet dhe shpresoj shumë që siç thotë populli ta ngrehni këmbën zhag edhe ju që pas jush të jetë një grua në këtë zyrë. Me besimin e plotë që gratë gjithmonë tregojnë kujdes të veçantë ndaj institucioneve dhe ndaj çdo qytetari të Republikës.
Në emër edhe të gjithë bashkëpunëtorëve këtu në Presidencë dhe shumë të tjerë që s’janë këtu tash për momentin, ju dëshiroj shumë suksese për gjatë kohës sa do të qëndroni këtu si ushtruese e detyrës. S’do të jetë punë e lehtë.
Edhe unë i kam provuar të dyja më 2021 edhe si kryeparlamentare edhe u.d. e presidentes. Sado që kanë sfida të veta, të jesh kreu i shtetit dhe ta udhëheqësh politikën e jashtme të vendit e ushtrinë e saj, dhe detyra të tjera si përfaqësim i unitetit janë përgjegjësi e jashtëzakonshme dhe ju dëshirojmë shumë sukses e shëndet në periudhën në vijim. Njëkohësisht shpresojmë shumë që Kuvendi sa më parë ta zgjedhë presidentin apo presidenten e re me shpresën që të kemi stabilitet institucional në një kohë kur jo vetëm shteti jonë dhe rajoni ynë, por e gjithë bota po kalon kriza të mëdha”, tha Osmani.
Në një postim në Facebook, Osmani theksoi se ky nuk kishte qenë vetëm rrugëtimi i saj. “Këto pesë vite nuk ishin historia e një njeriu të vetëm. Kanë qenë rrugëtimi ynë i përbashkët. Me njerëz nga çdo fushë, që besuan te Kosova. Që punuan, kontribuuan dhe shtynë përpara ide e mundësi për qytetarët tanë. Faleminderit që qëndruat me ne e për Kosovën tonë të përjetshme”, ka shkruar ajo.
Osmani, e cila mori detyrën me mbështetjen e Vetëvendosjes, nuk arriti të sigurojë një mandat të dytë, pavarësisht se e kishte shprehur publikisht dëshirën për të vazhduar qëndrimin në këtë post.
Çështja e zgjedhjes së presidentit ka qenë në qendër të diskutimeve politike që nga zgjedhjet e fundvitit të kaluar. Megjithatë, deri më tani, ajo mbetet e pazgjidhur. Deputetët kanë afat deri në fund të këtij muaji për të zgjedhur kreun e ri të shtetit; në të kundërtën, vendi shkon në zgjedhje të reja, siç ka vendosur Gjykata Kushtetuese.
Ngërçi lidhet kryesisht me mungesën e numrave të mjaftueshëm për kandidatë. Vetëvendosja, pas dy propozimeve të saj, Glauk Konjufca dhe Fatmire Kollçaku, nuk ka deputetët e nevojshëm për të kaluar procesin e zgjedhjes.
Opozita, nga ana tjetër, ka kërkuar një kandidat konsensual dhe ka refuzuar të votojë kandidatët e VV-së. Kryeministri Albin Kurti ka paralajmëruar në ditët në vijim takime me liderët e Partisë Demokratike të Kosovës dhe Lidhjes Demokratike të Kosovës.
gijotina.com/
Discussion about this post