Presidenti i SHBA-së, Donald Trump, e cilësoi si një “ditë të madhe për paqen botërore” marrëveshjen për armëpushim dyjavor mes SHBA-së dhe Iran, duke theksuar se kjo mund të shënojë fillimin e një faze të re stabiliteti në rajon.
Trump bëri të ditur se vendimi erdhi pas bisedimeve me Kryeministrin e Pakistanit Shehbaz Sharif dhe kreun e ushtrisë Asim Munir.
Sipas tij, pezullimi i sulmeve është i kushtëzuar nga hapja e menjëhershme dhe e sigurt e Ngushticës së Hormuzit nga Irani, një pikë kyçe për tregtinë globale të naftës.
“Kjo do të jetë një armëpushim i dyanshëm”, theksoi Trump, duke shtuar se SHBA ka arritur dhe tejkaluar objektivat ushtarake dhe tashmë është “shumë pranë një marrëveshjeje për paqe afatgjatë”.
Ai zbuloi se Uashingtoni ka marrë një propozim me 10 pika nga Irani, të cilin e konsideron bazë reale për negociata, ndërsa shumica e çështjeve të debatueshme mes dy vendeve janë zgjidhur.
Periudha dyjavore, sipas tij, do të shërbejë për finalizimin e marrëveshjes.
Trump e cilësoi situatën si një moment kyç për stabilitetin në Lindjen e Mesme, duke theksuar se një zgjidhje e konfliktit është më pranë se kurrë.
Çmimet globale të naftës kanë pësuar një rënie të ndjeshme, ndërsa tregjet aksionare kanë shënuar rritje të konsiderueshme, pas arritjes së një marrëveshjeje të kushtëzuar për armëpushim dyjavor mes Shteteve të Bashkuara dhe Iranit.
Marrëveshja përfshin edhe rihapjen e ngushticës strategjike të Hormuzit, një nga arteriet më të rëndësishme të transportit të energjisë në botë.
Nafta e tipit Brent ra me rreth 13%, duke zbritur në 94.80 dollarë për fuçi, ndërsa nafta e tregtuar në SHBA shënoi një rënie prej më shumë se 15%, duke arritur në 95.75 dollarë për fuçi.
Megjithatë, çmimet mbeten më të larta krahasuar me periudhën para nisjes së konfliktit më 28 shkurt, kur nafta tregtohej rreth nivelit 70 dollarë për fuçi.
Rritja e mëparshme e çmimeve të energjisë erdhi si pasojë e ndërprerjeve të furnizimit me naftë dhe gaz nga Lindja e Mesme, pasi Irani kërcënoi të sulmonte anijet që kalonin përmes ngushticës së Hormuzit, në përgjigje të sulmeve ajrore nga SHBA dhe Izraeli.
Në të njëjtën kohë, tregjet financiare reaguan pozitivisht ndaj zhvillimeve diplomatike. Indekset kryesore në rajonin Azi-Paqësor u rritën ndjeshëm gjatë sesionit të së mërkurës.
Discussion about this post