Vetëm një muaj pasi Drejtoria e Përgjithshme e Burgjeve refuzoi kërkesën e Durim Bamit për transferim nga paraburgimi Nr.313 në Tiranë drejt burgut të Fushë-Krujës, situata ka ndryshuar me një vendim të ri të firmosur nga drejtori i sapoemëruar, Adriatik Kupi. Sipas të dhënave, më 17 prill 2026 është miratuar transferimi i tij në burgun e Fushë-Krujës, duke e përmbysur vendimin e mëparshëm të administratës së burgjeve.
Në kërkesën e tij, Bami kishte argumentuar se qëndrimi në 313 përbënte rrezik për jetën, duke përmendur praninë e personazheve të tjerë të botës së krimit, përfshirë Emiljano Shullazin, me të cilin sipas pretendimeve të tij ka konflikte të hapura. Fillimisht kërkesa u refuzua nga ish-drejtori Klevis Qose, me arsyetimin se siguria e tij do të garantohej brenda institucionit dhe se lëvizjet e tij drejt SPAK-ut në kuadër të procesit gjyqësor krijonin edhe vështirësi logjistike për sistemin e burgjeve.
Durim Bami, i ekstraduar nga Emiratet e Bashkuara Arabe në shkurt 2026 pasi ishte arrestuar në Dubai në tetor 2024, po gjykohet nga SPAK në dosjen e njohur si “Metamorfoza 2”, ku përballet me akuza të rënda si “sigurimi i kushteve për vrasje”, “grup i strukturuar kriminal” dhe “kultivim i bimëve narkotike”. Sipas hetimeve, ai dyshohet edhe për përfshirje në tentativa eliminimi ndaj figurave të njohura, ndërsa vetë pretendon se është në rrezik nga anëtarë të tjerë të botës së krimit, çka ka sjellë edhe kërkesat e tij për ndryshim ambienti paraburgimi.
Discussion about this post