Është shtyrë sot në Gjykatën e Posaçme kërkesa e SPAK për pushimin e procedimit për gjyqtaren e posaçme, Irena Gjoka, e kallëzuar nga Partia Demokratike për flasifikim të vulave dhe formularëve.
Mësohet se, kërkesa e SPAK do të shqyrtohej nga gjyqtarja Marinela Osmani, ndërsa Prokuroria e Posaçme përfaqësohej nga prokurori Bledar Maksuti. Në seancë, në cilësinë e kallëzuesit ishin edhe avokatët e Sali Berishës, si edhe vetë Jamarbër Malltezi. Por, gjyqtarja Osmani vendosi shtyrjen e seancës për më datë 4 maj për shkak të kërkesës së Adriana Kalasë, një prej kallëzuesve.
Gjyqtarja Gjoka u kallëzua nga Partia Demokratike me pretendimin se ka fshehur në formularin e dekriminalizimit një dënim të dhënë ndaj saj nga një gjykatë në Janinë. Sipas SPAK, procesi ndaj saj është zhvilluar në mungesë dhe ajo nuk ka qenë në dijeni, duke shtuar se ndjekja penale lidhur me këtë fakt rezulton e shuar për shkak të parashkrimit.
Çfarë gjeti Prokuroria e Përgjithshme në hetime?
Prokuroria e Përgjithshme ka faktuar se gjyqtarja Irena Gjoka ka fshehur dënimin në Greqi në formularin e saj të vetëdeklarimit. Pas përfundimit të hetimeve të thelluara 2-vjeçare, Prokuroria thekson se vendimi i autoriteteve greke, për dënimin e Irena Gjokës, me detyrë gjyqtare në GJKKO, është autentik. Po në njoftimin e saj, Prokuroria sqaron se vendimmarrja për shkarkimin e Gjokës nga detyra apo jo, i takon KLGJ-së. Prokuroria e Përgjithshme i ka kaluar KLGJ-së vendimin autentik të dënimit të Gjokës, bashkë me vendimin e autoriteteve greke për arkivimin e dënimit për shkak të mos ekzekutimit. Ndërkohë që KLGJ me shumicë votash çështjen e referoi te ILD. Pas kësaj, Inspektori i Lartë i Drejtësisë regjistroi një hetim disiplinor ndaj gjyqtares.
Discussion about this post