Athina zyrtare ka rrëzuar deklaratat e kryeministrit Edi Rama për negociata të avancuara mes Shqipërisë dhe Greqisë lidhur me përcaktimin e Zonës Ekonomike Ekskluzive (ZEE), ose ndryshe kufijve detarë, duke hedhur poshtë skenarin për një marrëveshje të afërt dhe dërgimin e çështjes në Hagë.
Burime të larta diplomatike greke bëjnë të ditur për Protothema, se ndonëse çështja ka qenë pjesë e agjendës dypalëshe prej vitesh, procesi është ndërprerë që në momentin kur marrëveshja për kompromisin u dërgua në Gjykatën Kushtetuese të Shqipërisë, e cila në thelb e rrëzoi atë.
Sipas të njëjtave burime, aktualisht është pala shqiptare ajo që duhet të ndërmarrë hapat e nevojshëm për të ndryshuar vendimin e Gjykatës Kushtetuese, në mënyrë që procesi të mund të rifillojë.
Në të njëjtën kohë, në Ministrinë e Jashtme greke theksohet se përcaktimi i ZEE-së me Shqipërinë nuk përbën më prioritet të menjëhershëm për diplomacinë greke, sidomos pas marrëveshjeve të arritura me vende të tjera të rajonit, si Italia dhe pas zgjerimit të ujërave territoriale greke në Detin Jon.
Burimet nënvizojnë se, ndryshe nga sa është deklaruar nga z. Rama në intervistën e tij në Forumi i Delfit, nuk ekziston aktualisht asnjë dokument konkret apo tekst i dakordësuar për zgjidhjen e çështjeve të hapura mes dy vendeve.
Sa i përket perspektivës, Athina mbetet e fokusuar në zgjidhjen e përgjithshme të çështjeve dypalëshe, por pa konfirmuar ndonjë progres konkret brenda vitit 2026.
gijotina.com/
Discussion about this post