Gjyqtari i Apelit të GJKKO-së, Dhimitër Lara, është rikthyer në qendër të vëmendjes publike, jo vetëm për vendimet e fundit të kontestuara, por edhe për një episod të errët nga e shkuara e tij.
Episodi i vitit 1982
Në maj të vitit 1982, kur ishte 21 vjeç dhe punonte në ndërmarrjen kimike në Durrës, Lara u ndalua nga policia për sjellje të padenjë në publik.
Sipas dokumenteve të kohës së komunizmit, ai u arrestua pasi kishte ngacmuar seksualisht gra dhe vajza në ambientet publike, përfshirë edhe autobusët urbanë. Në disa raste, sipas burimeve arkivore, ai kishte kryer veprime të papërshtatshme fizike ndaj tyre dhe kishte ekspozuar organet gjenitale.
Dokumenti i asaj kohe shprehet se: “Me 12.05.1982 u ndalua Dhimitër Aleksandër Lara, 21 vjeç, punëtor në ndërmarrjen kimike, banues në Durrës, për arsye se në autobus ka kryer vepra të sjelljes së padenjë në shoqëri”.
Vetë Lara e ka deklaruar këtë episod në formularin e dekriminalizimit, duke sqaruar se ka qëndruar tre ditë në burg dhe më pas është liruar.
Vettingu dhe pikëpyetjet mbi pasurinë
Në maj të vitit 2019, Komisioni i Pavarur i Kualifikimit konfirmoi Larën në detyrë si gjyqtar i Apelit për Krime të Rënda.
Megjithatë, vendimi nuk ishte unanim. Anëtarja e KPK-së, Etleda Çiftja, doli me mendim kundër, duke ngritur dyshime serioze mbi pasurinë e tij.
Sipas saj, Lara nuk kishte deklaruar burimin e blerjes së një apartamenti në Tiranë (66 m² + 25 m² shtesë) të blerë në vitin 2006; Nuk arriti të provonte bindshëm ligjshmërinë e burimeve financiare; Kishte pasaktësi në deklaratat periodike; Nuk justifikoi burimet e huave të marra nga persona të tretë dhe nuk kishte të ardhura të mjaftueshme të ligjshme për disa pagesa të deklaruara
Vendimet e fundit dhe përplasja me Gjykatën e Lartë
Në zhvillimet më të fundit, Gjykata e Lartë e Shqipërisë ka prishur një vendim të Gjykatës së Posaçme të Apelit ku bënte pjesë edhe Lara, në çështjen ndaj ish-kreut të Prokurorisë së Vlorës, Aurel Zarka.
Sipas Gjykatës së Lartë, Apeli kishte interpretuar gabim ligjin, duke shtuar një akuzë e re (grup kriminal) në një fazë procedurale ku kjo nuk lejohej, kësisoj ishte rënduar pozita e të pandehurit në kundërshtim me Kodin e Procedurës Penale. Për pasojë, çështja u kthye për rigjykim me një tjetër trup gjykues.
Vendimet e gjyqtarit Lara janë kritikuar edhe në raste të tjera. Në një tjetër çështje, lidhur me dosjen e inceneratorëve, Gjykata e Lartë ka konstatuar se ai kishte dalë përtej kompetencave të tij dhe kishte marrë rol që nuk i takonte në proces.
Megjithatë, edhe pse këto qëndrime u cilësuan si të diskutueshme dhe potencialisht paragjykuese, masat e sigurisë në atë rast u lanë në fuqi.
Rruga e Dhimitër Larës, nga një episod problematik në rini, te një karrierë në nivelet më të larta të drejtësisë, shoqërohet sot me pikëpyetje mbi integritetin dhe debate mbi rolin e gjyqtarëve në proceset penale.
Discussion about this post