Sot në orën 12:00 përfundon afati për dorëzimin e kandidaturave për kryetar të Partisë Demokratike, ku Sali Berisha duket se po marshon i vetëm drejt zgjedhjeve të 23 majit.
Një udhëzim i mbajtur sekret deri në çastet e fundit ka vendosur filtra të fortë, duke ndaluar kandidimin e personave të dënuar me vendim të formës së prerë një kusht që penalizon drejtpërdrejt Ervin Salianjin.
Megjithatë, ish-deputeti Salianji është zotuar të sfidojë këto pengesa dhe të denoncojë çdo parregullsi në proces. Nga ana tjetër, aktivistja Evi Kokalari ka lëshuar akuza të forta ndaj Shkëlzen Berishës, duke pretenduar se kriteret u mbajtën të fshehura qëllimisht që prej 18 marsit për të bllokuar rivalët e mundshëm.
Ndërkohë, pavarësisht kufizimeve, Alesia Balliu pritet të dorëzojë kërkesën e saj sot.
Kriteret e PD-së kërkojnë profil të lartë politik dhe pastërti ligjore, duke lënë jashtë gare Salianjin për shkak të dënimit të tij për “kallëzim të rremë”.
Në datën 17 mars, kryesia e PD vendosi që zgjedhjet për kryetarin e PD të zhvillohen në datë 23 maj.
Në këtë situatë duket se më 23 maj i vetmi kandidat do të jetë Sali Berisha, i cili do të kërkojë besimin e demokratëve për t’i udhëhequr në 4 vitet e ardhshme. Sali Berisha ka dominuar PD prej krijimit të saj, në dhjetorin e vitit 1990. Ai u zgjodh kryetari i PD në vitin 1991 dhe qëndroi në këtë detyrë deri në vitin 1992 kur u bë Presidenti i Shqipërisë. Berisha u rikthye në krye të PD në vitin 1997 dhe e drejtoi këtë parti deri në vitin 2013 kur dha dorëheqjen pas humbjes së zgjedhjeve parlamentare.
Në shtatorin e vitit 2021, Berisha nisi lëvizjen “Foltorja” pasi Lulzim Basha, asokohe kryetar i PD-së, e përjashtoi nga Grupi Parlamentar. Në dhjetorin e vitit 2021 demokratët shkarkuan Lulzim Bashën dhe në 22 majin e vitit 2022, Sali Berisha u zgjodh kryetar i PD-së.
Discussion about this post