Ofroi 50 mijë euro garanci në këmbim të lirisë, Apeli i GJKKO lë në burg Ilir Metën

Apeli i GJKKO ka rrëzuar kërkesën e ish-presidentit Ilir Meta për lirimin nga qelia.

Vendimi u mor nga gjyqtarja Saida Dollani, e cila shqyrtoi ankimin e paraqitur nga Meta kundër vendimit të mëparshëm të Gjykatës së Shkallës së Parë.

Meta kishte kërkuar zëvendësimin e masës së arrestit në burg me një masë më të lehtë, si arrest në shtëpi, garanci pasurore, detyrim për t’u paraqitur në polici, ose ndalim të daljes jashtë shtetit.

Gjykata e Apelit vendosi të mos pranojë ankimin, duke lënë në fuqi vendimin nr. 242, datë 24 mars 2026, të Gjykatës së Shkallës së Parë.

Në vendim theksohet se palët do të njoftohen zyrtarisht dhe se ndaj këtij vendimi Meta ka të drejtë të bëjë rekurs në Gjykatën e Lartë.

Ilir Meta mbahet në paraburgim që prej tetorit të vitit 2024 dhe përballet me akuza për korrupsion në lidhje me aferën CEZ-DIA, kontratën lobuese të LSI-së në Shtetet e Bashkuara, si dhe për pastrim parash e fshehje pasurie.