Kryeqytetit do t’i shtohet së shpejti një tjetër terren modern futbolli, pasi Federata e Futbollit është drejt përfundimit të ndërtimit të fushës së re në zonën e Picallës, në bashkëpunim me akademinë “TR 19 Football Academy”. Projekti që ka nisur në muajin dhjetor ka hyrë tashmë në fazën përmbyllëse të punimeve.
Aktualisht po kryhet shtrimi i tapetit sintetik nga FSHF, një nga etapat më të rëndësishme të investimit, që pritet të finalizojë shumë shpejt ndërtimin e fushës dhe ta bëjë atë gati për përdorim nga sportdashësit dhe të rinjtë e zonës.
Punimet janë inspektuar nga afër nga Drejtori i Projekteve Infrastrukturore në FSHF, Kevin Lleshi, i cili në një prononcim për fshf.org theksoi rëndësinë e këtij investimi në kuadër të zhvillimit të infrastrukturës sportive në vend.
“Jemi në Picallë, në Tiranë, aty ku po ndërtohet një fushë e re. Ky investim po realizohet në bashkëpunim me Akademinë ‘Tirana Republic’. Aktualisht jemi në fazën finale të shtrimit të tapetit, ndërsa akademia ka kryer punimet e bazamentit, çka na lejon të avancojmë me punimet për përfundimin e fushës. Si Federatë, në kuadër të projektit ‘100 Fushat’, mbetemi të angazhuar për të rritur numrin e terreneve sportive që sjell një zhvillim cilësor të futbollit, sidomos për fëmijët dhe të rinjtë”, – u shpreh Kevin Lleshi.
Ky investim i ri synon të përmirësojë më tej infrastrukturën sportive në kryeqytet dhe të krijojë një hapësirë moderne e funksionale në shërbim të komunitetit sportiv.
Discussion about this post