Hantavirusi, një infeksion viral që në raste të rralla mund të shkaktojë komplikacione serioze, rezulton të ketë qenë prezent në Shqipëri prej shumë vitesh.
Mjeku Erion Dasho ka shpjeguar se virusi transmetohet te njerëzit kryesisht përmes kontaktit me urinën, jashtëqitjet ose mjediset e kontaminuara nga një lloj specifik brejtësi i njohur si “miu qafëverdhë”.
Sipas tij, ky brejtës i vogël ka qenë rezervuari kryesor i hantavirusit në Shqipëri dhe rastet e para janë identifikuar që në mesin e viteve ’80, kur në vend u regjistrua një shpërthim me dhjetëra të infektuar.
“Është një mi i veçantë, jo të gjithë minjtë e arave. Është një mi i vogël me qafë me ngjyrë të verdhë dhe njihet si miu qafëverdhë. Pikërisht ky ka qenë rezervuari i hantavirusit në Shqipëri”, u shpreh mjeku.
Shumë persona mund ta kenë kaluar pa e kuptuar
Sipas specialistëve, virusi vazhdon të qarkullojë edhe sot, por rastet e diagnostikuara zyrtarisht mbeten të pakta.
Kjo ndodh sepse shumica e të infektuarve e kalojnë sëmundjen në formë të lehtë, shpesh pa e kuptuar që janë prekur nga hantavirusi.
Simptomat në shumë raste ngjasojnë me gripin sezonal ose virozat e zakonshme, duke bërë që infeksioni të mos identifikohet.
“Pjesa më e madhe e infeksioneve kalon si një infeksion viral i zakonshëm, atë që rëndom e quajmë grip i stinës ose virozë stine. Personat mund të infektohen dhe të shërohen pa e marrë vesh që kanë qenë të prekur nga hantavirusi”, tha Dasho.
Kur bëhet i rrezikshëm virusi
Mjekët theksojnë se rastet më problematike janë ato ku infeksioni zhvillohet në forma më të rënda, duke prekur mushkëritë ose veshkat dhe duke kërkuar trajtim spitalor.
Megjithatë, format serioze të hantavirusit konsiderohen të rralla dhe shumica e pacientëve shërohen pa pasoja afatgjata.
Discussion about this post