Kryeministri Edi Rama ka reaguar ndaj artikullit të gazetarit Eddy Wax në Bruksel lidhur me debatin mbi marrëveshjen Shqipëri-Itali për emigrantët, duke deklaruar se citimi i reduktuar i deklaratës së ministrit të Jashtëm Ferit Hoxha kishte krijuar një interpretim të gabuar.
“Nuk ka vend këtu për një histori Edi kundër Eddy, sepse së pari, unë nuk u ankova për Eddy-n tjetër, dhe së dyti, tani që e keni publikuar me bujari të gjithë transkriptin, është krejtësisht e qartë se citimi i shkurtuar ishte mjaftueshëm çorientues që kushdo me një interes ideologjik ta përdorte sipas dëshirës së vet”, shkroi Rama.
Kryeministri shtoi se nuk kishte “asnjë hatërmbetje” lidhur me raportimin.
“Një Eddy duhet të bëjë atë që dëshiron, ndërsa Edi tjetër duhet të durojë atë që i duhet”, u shpreh ai me tone ironike.
Në fund të reagimit, Rama ritheksoi qëndrimin e tij për marrëdhëniet me Italinë:
“Thelbi mbetet i pandryshuar: atë që Italia kërkon nga Shqipëria, Italia e merr nga Shqipëria.”
Çfarë shkroi Eddy Wax, që solli reagimin e kryeministrit?
Rama kundër raportimit për marrëveshjen Shqipëri-Itali
Media “Rapporteur” thekson se u surprizua nga një reagim në rrjetet sociale i kryeministrit shqiptar Edi Rama, i cili kundërshtoi raportimin e një interviste të zhvilluar me ministrin e Jashtëm shqiptar Ferit Hoxha, intervistë që kishte shkaktuar debat politik në Itali.
Intervista kishte në fokus deklaratën e Hoxhës se marrëveshja Shqipëri-Itali për emigrantët nuk do të zgjatet pas vitit 2030, pasi deri atëherë Shqipëria synon të jetë anëtare e Bashkimit Europian.
Deklarata u pasqyrua gjerësisht në mediat italiane, përfshirë “La Stampa” dhe “Corriere della Sera”. Ministri i Jashtëm italian Antonio Tajani deklaroi para gazetarëve: “2030 është shumë larg; le të fokusohemi tek ajo që duhet të bëjmë tani.”
Rama reagoi online duke shkruar:Të gjithë gazetarëve nga Italia dhe më gjerë që po kontaktojnë lidhur me një citim të gabuar të raportuar nga një media… dua të ritheksoj qartë dhe, shpresoj, përfundimisht, se protokolli ynë me Italinë do të mbetet në fuqi për aq kohë sa Italia ta dëshirojë.”
Kryeministrja italiane Giorgia Meloni iu përgjigj shkurtimisht postimit të Ramës me fjalët: “Grazie Edi.”
Ndërkohë, media publikoi deklaratën e plotë të Ferit Hoxhës.
“Po ju them se pas pesë vitesh, sapo Shqipëria të anëtarësohet, kjo nuk do të jetë më territor ekstraterritorial. Do të jetë territor i Bashkimit Europian. Së pari, marrëveshja është për pesë vjet dhe nuk jam i sigurt nëse do të ketë zgjatje. Së dyti, nuk do të ketë zgjatje sepse ne do të jemi anëtarë të Bashkimit Europian.”, tha Hoxha.
Artikulli përmbyllet me deklaratën se autori është i gatshëm t’ia vërë në dispozicion kryeministrit transkriptin e intervistës, nëse ai dëshiron ta shohë.
Discussion about this post