Kryetari i Partisë Demokratike, Sali Berisha, u ka bërë thirrje deputetëve të opozitës që të mos pranojnë delegimin e interpelancave parlamentare nga kryeministri Edi Rama tek ministrat.
Gjatë një deklarate, Berisha tha se Kushtetuta e detyron kryeministrin të paraqitet vetë në interpelancë dhe se delegimi i kësaj përgjegjësie nuk njihet nga ligji themeltar i shtetit.
“Nëse Rama nuk vjen në interpelancë mos pranoni delegimin te ministrat. Nëse neni 80 i Kushtetutës përcakton se kryeministri është i detyruar të paraqitet në interpelancë, asnjë deputet s’do pranojë delegimin e interpelancës. Kushtetuta nuk e njeh një gjë të tillë. Çdo deputet që i kërkon kryeministrit interpelancë… se do përfundojmë kështu te drejtorët e ministrive. Ministri do i thotë zëvendësit dhe zëvendësi drejtorit. Nuk vjen?! Mirë, pastaj marrim vendimet tona. Por ne nuk pranojmë delegimin“, tha ndër të tjera Berisha.
Ai paralajmëroi se opozita mund të marrë vendime të tjera nëse kryeministri vijon të mos paraqitet në interpelancat e kërkuara nga deputetët.
Gjatë fjalës së tij, Berisha u shpreh se procesi i integrimit është plagosur rëndë dhe shkaktari kryesor është dosja e Belinda Ballukut, kryeministri Edi Rama, së bashku me Lindat e tij.
Ai tha se PD mbështet plotësisht procesin integrues të vendit, qoftë vetëm për shkak të kriterit gjeopolitik.
“Tani, siç e kanë mësuar shqiptarët, procesi i integrimit të Shqipërisë në BE është plagosur rëndë.
Si mund ta quajmë, është plagosur rëndë nga vjedhjet e Edi Ramës, Lubi Ballukut, Lindat e AKSHI-t dhe akte të tjera.
Ka ndodhur ajo që nuk është parë ndonjëherë, është ndërruar raporti dy herë, është pasuruar raporti dhe janë shtuar kërkesa thelbësore nga një seri vendesh, anëtare të BE.
Është bërë shumë e qartë se Edi Rama dhe Lubi Balluku janë një.
Dhe, ose votohet përfundimisht për të kaluar në këshillin e ambasadorëve, organ politik ky, vendimi i COELA-s, ose janë nja dy vende që kanë rezerva dhe që pritet që edhe ato të shtojnë në raport rezervat e tyre, në mënyrë që ky raport për Shqipërinë, i plotësuar dhe i transformuar plotësisht me situatën në vend, të votohet në këshillin e ambasadorëve dhe më vonë thirret konferenca ndërqeveritare, e cila duhej të ishte mbajtur që në mars, më vonë në prill, por nuk u mbajt.
Sidoqoftë, dy gjëra duhet t’i ketë të qartë çdo shqiptar.
Së pari, PD në mënyrë të vazhdueshme ka mbrojtur të vërtetat e realitetit shqiptar dhe i ka paraqitur ato para shqiptarëve dhe komunitetit ndërkombëtar.
Kjo parti do e bëjë këtë me çdo çmim, me çdo kusht dhe nuk do heshtë kurrë nga kjo.
Së dyti, PD mbështet plotësisht procesin e integrimit, qoftë vetëm për shkak të kriterit gjeopolitik.
Kriteri gjeopolitik është një kriter natyror, i cili ka të bëjë me përcaktimin e përkatësisë së Shqipërisë dhe shqiptarëve në sferat e influencës dhe ne nuk mundet kurrë të mos e mbështesim, ne mbështesim fuqishëm vendosjen e Shqipërisë aty ku e ka vendin, në familjen evropiane.
Duke thënë këtë, regjimi i Edi Ramës nuk plotëson asnjë kriter tjetër përveç atij gjeopolitik.
Duke thënë këtë, zotohemi se do bëjmë gjithçka kemi në dorë, do luftojmë me të gjitha mjetet që mundemi, që kriteret të arrihen ose të punohet për kriteret.
Aq sa ka një opozitë në dorë.
Pra, ky është qëndrimi i PD, por ua them këtu se procesi është i plagosur nga Lubi Balluku, Edi Rama, nga Lindat dhe pastaj nga Ergysi. Se dy Lindat janë ndër eksponentët kryesore të AKSHI-t në Shqipëri dhe Evropë”, u shpreh ai.
Discussion about this post