Një aksident rrugor ka ndodhur mëngjesin e sotëm në aksin Sarandë–Delvinë, pranë fshatit Karahazh, ku i lënduar ka mbetur një 16-vjeçar.
Sipas informacioneve paraprake, një automjet tip “Golf”, i drejtuar nga shtetasi D. Cauli, 16 vjeç, ka dalë nga rruga dhe ka përfunduar në një kanal anësor.
Pas njoftimit të dhënë nga kalimtarë të rastit, në vendngjarje mbërritën menjëherë shërbimet e policisë dhe ambulanca, të cilat i dhanë ndihmën e parë të miturit.
Ai u transportua me urgjencë në Spitalin e Sarandës, ku mjekët konstatuan frakturë në këmbë si dhe dëmtime të tjera në trup. Për shkak të gjendjes së tij, pritet që i mituri të transferohet për trajtim të specializuar në Tiranë.
Sipas deklarimeve të para, 16-vjeçari ka dyshuar se automjeti i tij mund të jetë prekur nga një mjet tjetër para se të humbiste kontrollin, por ka pohuar se nuk mban mend qartë momentet e aksidentit.
Policia ka nisur hetimet për të zbardhur shkaqet dhe rrethanat e plota të ngjarjes dhe për të verifikuar nëse në aksident është përfshirë edhe një automjet tjetër.
Discussion about this post