Një person është shpallur në kërkim nga Policia e Tiranës, pasi dyshohet se ka dhunuar drejtorin e Agjencisë Kombëtare të Ekonomisë së Mbetjeve (AKEM), Dhimitraq Prishka, institucion që funksionon në varësi të Ministrisë së Turizmit dhe Mjedisit.
Sipas burimeve policore, ngjarja ka ndodhur pas një konflikti që dyshohet të ketë lidhje me ndërprerjen e marrëdhënieve të punës së personit të shpallur në kërkim, Benard Fejzollari. Mësohet se ai ka pritur drejtuesin e AKEM pranë ambienteve të ministrisë, ku fillimisht mes tyre ka pasur një përplasje verbale.
Debati më pas ka degraduar në kanosje dhe dhunë fizike, ku i dyshuari pretendohet se e ka goditur me grusht zyrtarin. Pas denoncimit të ngjarjes, strukturat e Policisë kanë nisur veprimet hetimore për dokumentimin e plotë të rastit.
Në dëshminë e tij, Prishka ka pretenduar se fillimisht është ofenduar me fjalë fyese nga Fejzollari. Më pas, sipas tij, konflikti ka degraduar në dhunë fizike, ku ai është goditur fillimisht me shuplakë në fytyrë dhe më pas me grusht.
Drejtori i Agjencisë Kombëtare të Ekonomisë së Mbetjeve ka deklaruar se ka reaguar vetëm në kushtet e vetëmbrojtjes, duke e goditur edhe ai Fejzollarin pas sulmit të pretenduar ndaj tij. Ndërkohë, autoritetet po vijojnë hetimet për zbardhjen e plotë të rrethanave të ngjarjes, ndërsa Benard Fejzollari është shpallur në kërkim policor.
Discussion about this post