Parlamenti hungarez ka miratuar një amendament kushtetues që vendos një kufi maksimal prej tetë vitesh për ushtrimin e detyrës së kryeministrit, një ndryshim që praktikisht i mbyll rrugën ish-kryeministrit Viktor Orban për t’u rikthyer në krye të qeverisë.
Nisma u miratua pas fitores së kryeministrit aktual Peter Magyar në zgjedhjet parlamentare të prillit, duke i dhënë forcës së tij politike një shumicë prej dy të tretash në Kuvend. Ky rezultat i mundëson qeverisë së re të ndryshojë ose shfuqizojë ligje dhe amendamente të miratuara gjatë qeverisjes së Fidesz-it të Orbanit, përfshirë edhe dispozita kushtetuese.
Sipas amendamentit të ri, çdo person që ka ushtruar funksionin e kryeministrit për tetë ose më shumë vite nuk mund të zgjidhet më në këtë post. Kufizimi zbatohet për të gjitha mandatet e mbajtura pas 2 majit 1990. Në praktikë, kryeministrat do të mund të qëndrojnë në detyrë deri në dy mandate, ose gjithsej tetë vjet.
Ndryshimet kushtetuese parashikojnë gjithashtu shpërbërjen e Zyrës së Mbrojtjes së Sovranitetit, një institucion i krijuar gjatë qeverisjes së Orbanit, i cili ishte kritikuar nga opozita dhe organizatat e medias për etiketimin e kundërshtarëve politikë dhe gazetarëve si mbështetës të interesave të huaja.
Një tjetër element i rëndësishëm i amendamentit lidhet me fondacionet e menaxhimit të aseteve me interes publik. Me ndryshimet e reja, shteti rimerr të drejtat e themeluesit mbi këto struktura, ku gjatë viteve të fundit ishin transferuar pasuri shtetërore me vlerë qindra miliarda forinta.
Discussion about this post