Vazhdojnë kërkimet për gjetjen e trupit të 37-vjeçarit që u mbyt pasditen e djeshme në Liqenin e Ulzës, në rrethin e Matit. Viktima, banues në Laç, dyshohet se ka humbur jetën pasi ka rënë në ujë gjatë drejtimit të një mjeti lundrues.
Sipas njoftimit zyrtar të Policisë, ngjarja ka ndodhur rreth orës 18:20, kur Salla Operative e Komisariatit të Policisë Mat është informuar për incidentin. Dyshohet se 37-vjeçari me iniciale A. Z., ka humbur kontrollin mbi mjetin lundrues dhe ka përfunduar në ujë, ku më pas në tentativë për ta kapur sërish, është mbytur.
Në vendngjarje janë angazhuar forcat e Policisë së Matit dhe grupi hetimor, ndërsa janë njoftuar edhe polumbarët e RENEA-s për të vijuar kërkimet në liqen. Autoritetet po punojnë për zbardhjen e plotë të rrethanave të ngjarjes tragjike.
Discussion about this post