Kroacia siguroi fitoren e parë në Kupën e Botës 2026, duke mposhtur 1-0 Panamanë në ndeshjen e vlefshme për Grupin L, e zhvilluar në orët e para të mëngjesit të së mërkurës sipas orës shqiptare.
Takimi u vendos nga Ante Budimir, i cili pas aktivizimit nga stoli realizoi golin vendimtar në minutën e 54-t, duke u dhuruar tre pikët e para kroatëve në këtë edicion të Botërorit.
Në krahun tjetër, Panamaja pësoi humbjen e dytë në po aq ndeshje dhe mbetet pa pikë, duke humbur matematikisht çdo shans për kualifikim në fazën e mëtejshme të turneut.
Ndeshja ishte gjithashtu e veçantë për Luka Modric, i cili regjistroi paraqitjen e 200-të me fanellën e Kroacisë. Mesfushori legjendar iu bashkua kështu një grupi shumë të ngushtë futbollistësh me mbi 200 ndeshje ndërkombëtare, ku bëjnë pjesë edhe Cristiano Ronaldo, Lionel Messi dhe Bader Al-Mutawa.
Pas dy raundeve të para, Anglia kryeson Grupin L me katër pikë, po aq sa ka edhe Gana në vendin e dytë. Kroacia renditet e treta me tri pikë, ndërsa Panamaja mbyll tabelën pa asnjë pikë të grumbulluar.
Gjithçka do të vendoset në ndeshjet e fundit të grupit, ku Panamaja do të përballet me Anglinë, ndërsa Kroacia dhe Gana do të diskutojnë një sfidë që pritet të jetë vendimtare për kualifikimin. Një barazim mund t’i afrojë ndjeshëm të dyja skuadrat me fazën e 1/16-ave, por përballja premton gjithsesi rivalitet dhe emocione deri në fund.
Discussion about this post