Belgjika ka dhuruar një shfaqje të vërtetë force në ndeshjen e fundit të fazës së grupeve në Kupën e Botës, duke mposhtur Zelandën e Re me rezultatin e thellë 5-1.
Ky triumf jo vetëm që u siguroi “Djajve të Kuq” kualifikimin në raundin e 32 më të mirave, por u dha edhe vendin e parë në Grupin G falë diferencës më të mirë të golave ndaj Egjiptit.
Ndeshja nisi me presion të lartë nga Belgjika, e cila kërkonte me ngulm të shmangte një tjetër eliminim të turpshëm radhazi në fazën e grupeve. Leandro Trossard rrezikoi i pari, por gjuajtja e tij u largua mbi vijën fatale nga mbrojtësi Tyler Bindon.
Pak minuta më vonë, arbitri Adham Makhadmeh akordoi një penallti për Belgjikën për një prekje të topit me dorë nga Finn Surman, por pas rishikimit në VAR vendimi u anulua pasi dora u gjykua në pozicion natyral. Megjithatë, zhgënjimi belg zgjati pak. Menjëherë pas ndërprerjes për t’u hidratuar (hydration break), Trossard përfitoi nga një mbrojtje e dobët pas një goditjeje këndi dhe tundi rrjetën nga afërsia.
Ndeshja ishte historike për portierin Thibaut Courtois, i cili regjistroi ndeshjen e tij të 18-të në Botëror me kombëtaren, duke thyer rekord.
Zelanda e Re, si kombëtarja e renditur më poshtë në këtë turne (e 85-ta në botë), nuk arriti dot të përballonte ritmin në pjesën e dytë.
Trossard dyfishoi shifrat me një volej të bukur, përpara se Kevin De Bruyne të vuloste fatin e pikëve me një goditje të ulët e të saktë që la pa mundësi reagimi portierin Max Crocombe.
Zelanda e Re gjeti një gol ngushëllimi me anë të Elijah Just, por Belgjika nuk u ndal me aq.
Sulmuesi Romelu Lukaku u përgjigj menjëherë duke shënuar me kokë. Me këtë gol, Lukaku u bë golashënuesi më i mirë i të gjitha kohërave për Belgjikën në historinë e Kupës së Botës (6 gola).
Pak para fundit, zëvendësuesi Alexis Saelemaekers shënoi edhe golin e pestë të mbrëmjes.
Kjo fitore 5-1 shënon triumfin më të thellë të Belgjikës në historinë e saj në një Botëror. Në krahun tjetër, Zelanda e Re e mbyll turneun në vendin e fundit me vetëm një pikë, duke u barazuar me Hondurasin si skuadrat që kanë luajtur më shumë ndeshje në Botëror pa fituar asnjëherë (4 barazime, 5 humbje).
(KLIKO: ZELANDA E RE – BELGJIKË)
Discussion about this post