Norvegjia ka shkruar historinë në Botërorin 2026, duke siguruar për herë të parë një fitore në fazën me eliminim direkt të Kupës së Botës.
Skuadra nordike mposhti 2-1 Bregun e Fildishtë në një sfidë të luftuar deri në sekondat e fundit.
Norvegjezët e nisën më mirë ndeshjen dhe krijuan rastet e para me Erling Haaland, i cili ishte vazhdimisht një kërcënim për mbrojtjen kundërshtare.
Edhe Bregu i Fildishtë reagoi dhe iu afrua golit me Nicolas Pépé, por pa arritur të zhbllokonte rezultatin.
Në minutën e 39-të, Antonio Nusa realizoi një supergol nga distanca, duke kaluar Norvegjinë në avantazh me një goditje të pandalshme.
Afrikanët u hodhën në sulm pas pushimit dhe rritën presionin, duke krijuar disa raste të mira për të rikthyer ekuilibrat.
Shpërblimi erdhi falë Amad Diallos, i cili realizoi një aksion individual spektakolar dhe barazoi shifrat me një gol që konsiderohet ndër më të bukurit e këtij Botërori.
Megjithatë, festa e Bregut të Fildishtë zgjati pak.
Në momentin vendimtar, Erling Haaland u gjend në vendin e duhur pas një asistimi të Patrick Berg dhe shtyu topin në rrjetë për golin e fitores 2-1.
Në minutat e fundit, portieri Orjan Nyland bëri një pritje vendimtare ndaj një goditjeje dënimi të Amad Diallos, duke ruajtur avantazhin e Norvegjisë.
Me këtë sukses historik, Norvegjia avancon në fazën tjetër, ku e pret një duel shumë i vështirë përballë Brazilit.
Nga ana tjetër, Bregu i Fildishtë largohet me kokën lart nga Botërori, pasi regjistroi paraqitjen më të mirë në historinë e pjesëmarrjeve të tij në Kupën e Botës.
Discussion about this post