Brazili ka marrë një lajm shumë të mirë në prag të ndeshjes së 1/16 së finales së Kupës së Botës ndaj Norvegjisë, pasi Raphinha është rikthyer në stërvitje dhe ka nisur fazën përfundimtare të rikuperimit.
Sulmuesi i Barcelonës zhvilloi seancën e parë individuale në fushë në New Jersey, pas dëmtimit muskulor në kofshën e djathtë që e mbajti jashtë ndeshjeve të fazës së grupeve.
29-vjeçari ka punuar intensivisht me stafin mjekësor të kombëtares braziliane, duke treguar se është pranë rikthimit në dispozicion të trajnerit Carlo Ancelotti.
Megjithatë, tekniku italian nuk dëshiron të marrë asnjë rrezik me një nga lojtarët më të rëndësishëm të skuadrës.
Vendimi për aktivizimin e Raphinhas pritet të merret vetëm pak para sfidës me Norvegjinë, në varësi të gjendjes së tij fizike.
Ky është dëmtimi i pestë muskulor për Raphinhan gjatë sezonit 2025-2026, ndaj stafi mjekësor po monitoron me kujdes çdo hap të rehabilitimit për të shmangur një rikthim të parakohshëm.
Edhe pse mungesa e tij është ndjerë, Brazili ka gjetur zgjidhje me talentin Rayan, i cili ka bërë paraqitje pozitive në repartin ofensiv.
Objektivi kryesor i “Seleçaos” mbetet që Raphinha të rikthehet 100 për qind i gatshëm për fazat më të rëndësishme të Kupës së Botës, duke shmangur çdo rrezik për një dëmtim më serioz.
Discussion about this post