Përplasjet para Kuvendit/ QSUT jep numrin sa persona kanë shkuar në spital, policë dhe protestues

Përplasjet mes protestuesve dhe forcave të policisë gjatë protestës së zhvilluar këtë të enjte para Kuvendit kanë lënë pas 19 persona të lënduar, të cilët kanë marrë ndihmë mjekësore në Spitalin Universitar të Traumës dhe në Qendrën Spitalore Universitare “Nënë Tereza”.

Sipas një njoftimi zyrtar, në Urgjencën e Spitalit të Traumës janë trajtuar 14 efektivë policie dhe 2 protestues.

Katër prej efektivëve vijojnë të jenë nën kujdesin e mjekëve, ndërsa pjesa tjetër e policëve dhe dy protestuesit janë larguar pasi kanë marrë ndihmën e nevojshme mjekësore.

Ndërkohë, në QSUT janë paraqitur për trajtim edhe një efektiv policie dhe dy protestues të tjerë.

Të tre kanë lënë ambientet e spitalit pas marrjes së shërbimit mjekësor.

Në total, pas incidenteve të regjistruara gjatë protestës, 19 persona kanë marrë trajtim mjekësor, prej të cilëve 15 janë efektivë policie dhe 4 protestues.

Aktualisht, vetëm katër efektivë policie vijojnë të qëndrojnë të shtruar për trajtim, ndërsa të gjithë personat e tjerë të lënduar janë larguar nga spitalet pas stabilizimit të gjendjes së tyre.