Asociacioni i Gazetarëve të Shqipërisë (AGSH) ka dënuar ashpër incidentet ndaj gazetarëve gjatë protestës së zhvilluar këtë të enjte para Parlamentit, duke theksuar se punonjësit e medias janë sulmuar si nga efektivë të Policisë së Shtetit, ashtu edhe nga protestues.
Sipas AGSH-së, gjatë raportimit në terren janë regjistruar raste të përdorimit të forcës dhe ndërhyrjeve ndaj gazetarëve, si edhe episode intimidimi dhe dhune nga protestues, duke ngritur shqetësime serioze për sigurinë e mediave gjatë mbulimit të protestave.
Organizata bën të ditur se një pjesë e incidenteve janë dokumentuar edhe me pamje filmike, ndërsa thekson se sulmet ndaj gazetarëve përbëjnë një cenim të lirisë së shprehjes dhe të drejtës së publikut për t’u informuar.
Në reagimin e saj, AGSH nënvizon se gazetarët nuk janë palë në protesta, por ndodhen në terren për të dokumentuar zhvillimet, ndaj siguria e tyre duhet të garantohet nga të gjitha palët e përfshira.
Asociacioni i ka bërë thirrje Agjencisë së Mbikëqyrjes Policore të nisë menjëherë hetime për rastet e dyshuara të përdorimit të pajustifikuar të forcës ndaj gazetarëve dhe të mbajë përgjegjës çdo efektiv që mund të ketë shkelur ligjin.
Njëkohësisht, AGSH u ka kërkuar edhe protestuesve të respektojnë punën e medias dhe të shmangin çdo formë dhune apo pengese ndaj ekipeve të raportimit, duke theksuar se liria e informimit duhet të mbrohet në çdo rrethanë.
Discussion about this post