Një ngjarje e rëndë ka tronditur komunitetin shqiptar në Itali. Pas katër ditësh në luftë për jetën, ka ndërruar jetë 27-vjeçari shqiptar Florian Cani, i cili u plagos rëndë në një aksident në vendin e punës në Due Carrare, në provincën e Padovës.
Aksidenti ndodhi më 26 qershor, kur një shtyllë druri telekomunikacioni u rrëzua dhe e goditi të riun, duke i shkaktuar dëmtime shumë të rënda.
Pas ngjarjes, ai humbi menjëherë ndjenjat dhe u transportua me helikopter drejt spitalit, ku u shtrua në repartin e kujdesit intensiv.
Pavarësisht përpjekjeve të mjekëve, Florian Cani nuk arriti ta fitonte betejën për jetën dhe ndërroi jetë më 30 qershor, pa rifituar asnjëherë vetëdijen.
Menjëherë pas aksidentit, në vendngjarje mbërritën karabinierët e Kompanisë së Abanos dhe ekspertët e Spisal, të cilët kryen hetimet dhe verifikimet për të zbardhur shkaqet e ngjarjes.
Vdekja e 27-vjeçarit ka rikthyer në vëmendje shqetësimin për sigurinë në vendet e punës në Itali.
Roberto Toigo, sekretar i përgjithshëm i UIL Veneto, deklaroi se rajoni po përjeton një vit alarmant për aksidentet fatale në punë, duke kërkuar angazhim më të madh nga institucionet dhe punëdhënësit për garantimin e kushteve të sigurta të punës.
Familja e të riut, me origjinë nga Shqipëria dhe banues në Gemona del Friuli, kishte shpresuar deri në momentin e fundit për një mrekulli, por fatkeqësisht ai nuk arriti t’u mbijetonte plagëve të marra.
Discussion about this post