Deputetja Marjana Koçeku ka reaguar pas tensioneve të regjistruara gjatë protestës së zhvilluar këtë të enjte para Kuvendit, duke kritikuar ashpër mënyrën se si, sipas saj, policia ndërhyri ndaj protestuesve.
Në një reagim të publikuar në rrjetet sociale, Koçeku tha se e ka ndjekur me shqetësim dhunën e ushtruar ndaj qytetarëve, duke e cilësuar atë si të vetmin mesazh politik që pushteti po u jep protestuesve.
“Kur argumentet i mbarojnë një shteti, mbesin vetëm shkopi i gomës, prangat dhe çizmja e policit. Por asnjë pushtet nuk e ka zgjatur jetën e vet duke goditur qytetarët që kërkojnë të dëgjohen”, shprehet deputetja.
Sipas Koçekut, historia ka treguar se përdorimi i forcës nuk është zgjidhje për pakënaqësinë qytetare dhe se çdo pushtet që zgjedh t’u përgjigjet protestave me dhunë nuk po demonstron forcë, por mungesë aftësie për të bindur qytetarët.
“Në një shtet që i përgjigjet pakënaqësisë qytetare me dhunë, nuk po shohim forcë, por pafuqinë e tij për të bindur”, thekson ajo në reagimin e saj.
Deklarata e Koçekut vjen pas përplasjeve mes protestuesve dhe forcave të policisë para Parlamentit, ku pati të lënduar, persona të shoqëruar dhe tensione të forta gjatë zhvillimit të protestës.
Discussion about this post