Zëvendëspresidenti i Parlamentit Europian, Nicolae Stefanuta, ka reaguar ashpër pas përplasjeve dhe dhunës së raportuar gjatë protestës së zhvilluar këtë të enjte para Kuvendit në Tiranë, duke e cilësuar situatën si të papranueshme.
Në një reagim të shpërndarë në rrjetet sociale, eurodeputeti ka dënuar përdorimin e forcës ndaj protestuesve, duke theksuar se një sjellje e tillë bie ndesh me parimet demokratike dhe standardet europiane.
“Dhuna policore ndaj protestuesve është e papranueshme”, është shprehur Stefanuta, duke ndarë edhe pamje nga incidentet e raportuara gjatë protestës.
Ai ka rikujtuar se së fundmi ka vizituar Shqipërinë, ku është takuar me përfaqësues të shoqërisë civile dhe institucione të ndryshme, duke theksuar rëndësinë e njohjes së realitetit në terren.
“Duhet të dëgjojmë qytetarët dhe të kuptojmë çfarë ndiejnë. Shqipëria meriton anëtarësimin në Bashkimin Europian, por gjithashtu meriton shtetin e së drejtës dhe drejtësinë, ashtu si në Europë”, ka deklaruar ai më herët.
Reagimi i tij vjen në një moment tensionesh të forta në vend, ku përplasjet mes protestuesve dhe policisë kanë shkaktuar të lënduar, shoqërime dhe reagime të shumta politike brenda dhe jashtë vendit.
Stefanuta paralajmëron se raste të tilla mund të ndikojnë negativisht në procesin e integrimit europian të Shqipërisë, duke theksuar se respektimi i të drejtave të njeriut dhe lirisë së protestës janë elemente thelbësore për BE-në.
Discussion about this post