Të paktën 18 persona kanë mbetur të plagosur pas dy shpërthimeve që tronditën qendrën e Damaskut në Siri, gjatë vizitës së presidentit francez Emmanuel Macron në vend.
Sipas autoriteteve siriane, shpërthimet ndodhën pranë hotelit ku Macron kishte kaluar natën, ndërsa Pallati Elysee konfirmoi se vizita e liderit francez do të vijojë sipas planit.
Ngjarja ndodhi pak para se televizioni shtetëror sirian të njoftonte mbërritjen e Macron në pallatin presidencial, ku ai do të zhvillonte një takim me homologun e tij sirian Ahmed al-Sharaa.
Ministria e Brendshme e Sirisë bëri të ditur se mes të plagosurve janë edhe katër efektivë policie. Sipas raportimeve, shpërthimet u shkaktuan nga dy pajisje artizanale, njëra e vendosur brenda një makine të parkuar në rrugë dhe tjetra në një kosh plehrash.
Autoritetet thanë se pajisjet shpërthyen gjatë përgatitjeve për çmontimin e tyre.
Një burim sigurie i tha agjencisë franceze të lajmeve AFP se eksplozivët ishin vendosur pranë hotelit luksoz Four Seasons, ku presidenti francez kishte qëndruar gjatë natës.
Emmanuel Macron është lideri i parë perëndimor që viziton Sirinë pas rënies së sundimtarit afatgjatë Bashar al-Assad në vitin 2024.
Pavarësisht incidentit të sigurisë, autoritetet franceze kanë bërë të ditur se programi i vizitës do të vazhdojë.
Discussion about this post