Universiteti Bujqësor i Tiranës hap doktoraturën në programin e studimit. Në këtë konferencë kanë marrë pjesë Ministrja e Arsimit dhe Sportit Evis Kushi së bashku me kryeministrin Edi Rama dhe Ministren e Bujqësisë dhe Zhvillimit Rural Frida Krifca.
Në bashkëpunim me qeverinë gjermane ka nisur një program doktorature në degën Bujqësi, Mjedis, Bioteknologji, Agrobiznes dhe Mjekësi Veterinare, i cili synon kualifikimin e mëtejshëm të studentëve ekselentë dhe profesionistëve të rinj, duke shfrytëzuar ekselencën e Bashkimit Evropian
Gjatë fjalës së saj ministrja Kushi ka nënvizuar se UBT është i pari universitet që e lançon këtë program.
“Ju keni qenë gjithmonë ndër universitetet më avangardë në Shqipëri, sepse diplomat e Institutit të Lartë Bujqësor njiheshin jashtë Shqipërisë edhe në kohën kur Shqipëria ishte totalisht e izoluar nën regjimin komunist. Por sot ambiciet tuaja duhet të jenë shumë më të larta, jo thjesht të njihen diplomat tuaja në EU, por të jeni një zgjedhje e preferuar për cilësinë nga studentët shqiptarë, studentët e rajonit, edhe me gjerë”, tha Kushi.
Më tej ajo shtoi se MAS do jetë shumë rigoroze, dhe pret që edhe universitetet të jenë njësoj rigorozë në respektimin e të gjitha atyre kritereve, të hartuara së bashku.
Së fundmi ministrja shtoi se hapja pas disa vitesh i programeve të doktoraturës është një tjetër arritje e rëndësishme.
“Unë ju falënderoj ju, por edhe universitetet e tjera në vend që së bashku edhe me ekspertët në MAS arritëm t’i rishikojmë të gjitha procedurat dhe aktet nënligjore, duke hartuar udhëzuesin dhe VKM përkatëse në përshtatje me ligjin e ri të arsimit të lartë”, mbylli diskutimin ministrja.
Discussion about this post